Decenes de maestros y maestres de les llingües propies de la comunidá desplazáronse a la capital del Estáu pa encadenase de manera simbólica y denunciar estes cuatro décades «d’interinidá» frente al ministeriu y el Congresu; «tamos contentes del impautu, pero nun baxamos la guardia», afirmen
L’aición repitióse frente al Ministeriu d’Educación, Formación Profesional y Deportes, y el Congresu. Docentes de Llingua Asturiana y Gallego-asturiano desplazaos a Madrid nun autocar y en coches particulares encadenábense ente ellos y mostraben folios colos años de caún de los cursos, dende’l 1984, nel que l’asturianu ta na enseñanza. Depués de citalos, ún a ún, glayaben en comuña «ensin especialidá», una escena que, xunto a la pancarta de la convocante Asociación de Docentes d’Asturianu y Eonaviego/Gallego-asturiano (ADAE) ‘Especialidá docente, trabayu decente’ y banderes d’Asturies y del corazón de demanda de la oficialidá de la Xunta pola Defensa de la Llingua Asturiana (XDLA), llamó l’atención de les munches persones que pasiaben pela zona, sobre manera frente a la Cámara Baxa, sitiu mui visitáu polos turistes.
«Tamos contentes del impautu, pero nun baxamos la guardia», comunicaba a la vuelta Claudia Menéndez, presidenta d’esti coleutivu, que tuvo’l sofitu en Madrid del Sindicato Unitariu Autónomu de Trabayadores de la Enseñanza d’Asturies (SUATEA) y Comisiones Obreres (CCOO) Enseñanza, amás de la visita de representantes de la FSA-PSOE y Podemos. Precisamente, la Federación Estatal d’Enseñanza de CCOO rexistró un escritu solicitando una xunta col secretariu d’Estáu d’Educación pa tratar esta situación.
Mientres, los maestros treslladaron un escritu a la ministra Milagros Tolón nel qu’espliquen que «vinomos a Madrid pa manifestanos y reivindicar lo que ye xusto: que 332 docentes que ponemos enseñances de Llingua asturiana y Gallego-asturiano tengamos los mesmos derechos llaborales qu’l restu de compañeros y compañeres de claustru». «La nuesa intención nun ye que’l Ministeriu d’Educación cree les nueses especialidaes, sinón qu’incorpore nos Reales Decretos que regulen les especialidaes docentes les previsiones relatives a les llingües que, nun siendo cooficiales, tienen proteición llegal y implantación curricular, al igual que se recueye pa llingües cooficiales», reclamaron depués de detallar los sofitos que tien n’Asturies la so reivindicación.
Dende ADAE insisten en que nun esiste torga llegal pa resolver esta situación y alvirtierten que, de nun haber meyores nes selmanes próximes, van retomar les movilización n’Asturies, ensin refugar una posible fuelga. Nesi sen, encamienta al Gobiernu asturianu «a cumplir el so compromisu d’aporfiar por qu’esti alcuentru se celebre aína o, nel so defectu, formalizar una solicitú formal al ministeriu pa que s’aborde esta situación».
