L’Asociación de Docentes d’Asturianu y Eonaviego/Gallego-asturiano (ADAE) asoleyó en redes sociales una pieza audiovisual que rellata la inestabilidá que sufren los más de 330 profesionales que ponen clase nestes materies pola falta de especialidá; «los alumnos tamién lo sufren», recuerden
«7 años de docencia, 7 centros diferentes; 7 comienzos y 7 despedíes. Porque ser maestra de Llingua Asturiana ye eso: volver a empezar cada setiembre, siempre». Asina entama’l videu espublizáu ayeri pola Asociación Docentes d’Asturianu y Eonaviego/Gallego-asturiano (ADAE) nes sos redes sociales que se fixo viral, como amuesen les más de 10.000 visualizaciones que tuvo namái en dos hores después de la so xuba y les cuasi 40.000 qu’algamaba nel momentu de la redaición d’esta información. L’oxetivu del mesmu ye «sensibilizar sobre la situación del profesoráu de dambes asignatures, una discriminación llaboral qu’afecta a más de 300 docentes dende fai 41 años y que sigue ensin una rempuesta efectiva per parte de les alministraciones competentes». Too pola falta d’especialidá docente que niega’l Ministeriu d’Educación y Formación Profesional magar el consensu esistente n’Asturies, como amuesa la postura común de Gobiernu, sindicatos y comunidá educativa, col argumentu de la falta d’oficialidá d’entrambes llingües.
Na pieza audivisual una profesora de la materia pon pallabres, mientres se muestren imáxenes de la so llegada a un centru, a la esperiencia que vive esti coleutivu, esto ye, «el cambiu de centru educativu cada cursu, la imposibilidá d’estabilizase, el desempeñu de les mesmes funciones que’l restu del profesoráu y la posesión de la mesma formación universitaria, pero ensin tener accesu a los mesmos drechos llaborales», un «abusu de temporalidá» que «afecta tanto a docentes como al alumnáu y a la calidá del sistema educativu». Sobre esto último, la maestra que llocuta recuerda que «los alumnos sábenlo —en referencia al cambiu de profesor tolos años— y tamién lo sufren. Cuando descubres qué necesiten, qué-yos preocupa… Cuando la clas yá ye un espaciu de confianza, toca marchar».
«A igual formación y mesmu trabayu, mesmos drechos», reclamen dende ADAE, que solicita al Gobiernu «qu’apure a pidir la xunta cola ministra d’Educación que la conseyera d’Educación se comprometió a solicitar el pasáu 21 de xineru pa encamentar a la so homóloga a modificar los reales decretos que torguen la convocatoria d’oposiciones pa esti colectivu». Amás, pide «un papel más activu y decidíu” al presidente Adrián Barbón. «La llealtá con Asturies nun tien de tar presente namás na negociación de los presupuestos, tamién tendría de talo na defensa del so profesoráu cuando hai una normativa estatal que-y niega a esti colectivu la igualdá de drechos llaborales», espresen los docentes.
