Atopo muyeres callaes en chigres, muyeres callaes n’estadios de fúbol, n’ilesies, colexos… Si maricamos nel conceutu nun somos más que muyeres nun mundiu d’homes
Facía sol. Quedaben esautamente 17 díes pa Nuechebona y quedamos en Cimavilla. Dos cañes, 120 minutos, aprosimadamente 13.800 pallabres y ún par de chuchos pa que ficiere la entruga’l millón; “Alma, ¿pa tí qué ye más importante, el feminismu o l’ecoloxismu?”. Agüeyé la indiferencia nes moces qu’ocupaben les otres meses, avezaes a sentir como la so llucha diaria queda rebaxada a una broma que namás tien cabida nun mundiu d’homes.
Atopo muyeres callaes en chigres, muyeres callaes n’estadios de fúbol, n’ilesies, colexos… Si
maricamos nel conceutu nun somos más que muyeres nun mundiu d’homes.
Olympe de Gouges, defendió que namás les muyeres vamos ser quién a algamar ún feminismu puru, tresversal y anque paeza estúpido, igualitariu. Nestos díes d’orpín y ventada, Xixón faeme pensar de más n’Olympe, onde les xugadores del Telecable sienten darréu como los paisanos-y recen a Djuka demientres son elles les campeones tres l’anonimatu, nun mundiu d’homes. Enfoto esti artículu de malnera personal, altraviés la tristura que me produz la normalización del machismu non-mazcaritáu. Llevo dende’l 2022 na direutiva d’Iniciativa Pol Asturianu, presenté ún programa na televisión, fui mayestra de ceremonies, llocutora de radio, ponente… y fízoseme creyer que lo que me falta ye saya, sóbrame curva y llingua, fáltame tiesta.
Llevo cinco meses poniendo clas de refuerciu nun cole, tengo namás dos neñes. Feminismu ye dexales qu’echen la llingua a pacer, deprendeles a que la pallabra de nengún paisanu ye más que la d’elles. Insisto en que tengan les rellaciones sexuales que-yos pete, coles llindes namás qu’elles marquen. Porque’l feminismu faese acullá’l 8M, hai que ser contestones, gayoleres, repunantes, y mamarraches tol añu. Yo quiero que a les mios neñes nun les toque naide, que nun les ridiculicen, nin cuestionen la so verdá; quiero a les mios neñes, tamién a les compañeres de trabayu, a les collacies, a mio ma. Quiero que nesti mundiu d’homes nun mos anulen, nin mos violen, que nun mos espliquen de más. Quiero prendéi fuéu a esti mundiu d’homes que nun me pertenez, en cambio faigo tik-toks pa que les moces vean que tamién hai muyeres nel asturianismu.
Por favor, nesti 8M nun escaezáis qu’enantes Rodrigo Cuevas hebo una Anabel Santiago. Enantes Xune Andadre, tuvieron les guisanderes. Y siempres, al lláu d’ún home que reivindicaba, taben elles faciendo cócteles Molotov.
Agora, ¿pa ti que ye más importante, el feminismu o l’ecoloxismu?
Alma Hidalgo es comunicadora y miembro de la directiva de Iniciativa Pol Asturianu
