«Pensé nes vueltes que se dan a veces na política y otros espacios, pa facer normal, lo que nos ambientes populares, familiares y distendíos ye normal»
Pasaba esti día dando una vuelta pel parque Manfer de la Llera pa cruzar pa l’Avenida Schultz. Yera de tarde, más o menos sedríen les cinco, nuna tarde mui guapa pa tar al aire llibre, echase en Los Pericones o tomar una botellina sidra. Y nuna d’estes, mientres caminaba tranquilamente sentí a unos paisanos mayores charrar nos bancos del parque (porque, amás, facíenlo bastante alto, nun debíen oír mui bien). Taben falando del Sporting. Parecióme una escena mui nuestra, mui de los barrios de la nuestra ciudá, pero más habitual y totalmente normal tovía yera la forma d’echar la llingua a pacer que taben usando: l’asturianu, sí. Y ye que no poco que sentí charrar a estos señorinos, tolo que falaben podría trescribise prácticamente na so totalidá usando la normativa de l’Academia de la Llingua Asturiana. En Xixón, a un cachín del centru (non en nenguna braña) y con poca pinta de tar pendientes de los tuviera escuchando nadie.
Siguí caminando y pensé nes vueltes que se dan a veces na política y otros espacios, pa facer normal, lo que nos ambientes populares, familiares y distendíos ye normal. Pensé que de tener una política llingüistica n’Asturies como la tuvieron en Galicia, esa conversación tendría llugar nun asturianu tovía más ricu y alfabetizáu. Pero tamién pensé, que pesie a la situación del nuestru idioma, esti sigue vivu y qu’esperemos que, col tiempu, les instituciones sigan meyorando e incorporándolu con normalidá; pa que cuando yo tenga la edá d’esos paisanos, pueda sentame a echar la llingua a pacer colos mios amigos nesi mesmu parque, col Sporting en primera a poder ser y col asturianu como llingua oficial. Sedría una forma mui guapa d’honrar la memoria del escritor Mánfer de la Llera y un síntoma de que les coses a veces tamién van a meyor.
