¿Esiste una Asturies na que poder espolletar contenta? ¿Esiste acasu una Asturies?
Mio güelu ye pa mín lo que pa les modernes, un imperiu romanu. Pasó años corriendo tres el sayu la fame, y corrió tanto que llegó a Asturies. Pensái n’Antonio, que nun tinía nada nesta tierra y agora podría sentir a una nieta falar asturianu. Yo pienso n’eso tolos díes, más agora, que pienso como mio güelu fizo floritura nesti país y yo toi bien lloñe, durmiendo nel colchón hinchable la mio amiga ente Atocha y la nada.
¿Esiste una Asturies na que poder espolletar contenta? ¿Esiste acasu una Asturies? Yo pienso en les moces que fueron conmigo a clas y que topen rempuestes nel sur, pienso en Sonia que va colar pal Reino Xuníu namás con una mochila enllena señardá, pienso tamién en que va meses que nun veo a Eva, nin a César, Félix… A mín cuando m’entruguen, namás pienso na Asturies que culpabiliza a les mios collacies d’intentar topar ún futuru dignu, cuando nun conozo xente que quiera más al mio país qu’elles.
Y como nun tar enfadada con ella, con Asturies, cuando mio güelu echó un pulsu con ella pa que la so nieta pudiere espoxigar onde él curó la guerra, y yo topo probeza ehí onde pongo’l güeyu, probeza, xentrificación y foriatos.
Y anque la pataleta dure, cuando les mios collacies tornen, el mundu para, porque sedrán elles, nosotres, les úniques que nun permitan qu’Asturies s’afuegue. Que s’enteren dende lo más fondo la nuesa tierra, que la xente mozo nun quier colar d’equí, pero tampoco mos presta malvivir por principios; sentise estraña na to casa por militancia, ta pasao de moda.
Nun queremos vivir una película de posguerra, vos prometo que namás mos prestaría algamar una vida tranquila. Feliz cumpleaños a mio güelu y al mio país, total, a nengún voi ser quién ayudar a soplar les veles.
