El periodista y escritor en llingua asturiana, trés veces ganador del Premiu Máximo Fuertes Acevedo d’ensayu, finó nel so llar d’Avilés a la edá de 40 años; nel Congresu Mundial de Cultura Asturiana (CMCA) va entamase un homenaxe na so alcordanza
L’asturianismu cultural sufre una nueva gran perda. Damián Barreiro finaba anueche a los 40 años nel so domiciliu, dexándonos un gran llegáu en cuestiones de cultura popular y llingua asturiana. Periodista y escritor, tien asoleyaos dellos ensayos gallardonaos, y cola so canal de YouTube ‘Horros y Frixuelos’ abrió campos nuevos pa la difusión de lo asturiano. Amás yera una persona mui activa en redes sociales y militante históricu del movimientu de reivindicación llingüística.
Les reaiciones nun tardaron n’asocedese depués de que la noticia de la so muerte fora conociéndose per llamaes, mensaxes o redes sociales. «Marchónos Damián Barreiro. Morriónos un amigu y nun nos salen les palabres. Él, que trabayaba con elles, que con aquella facilidá discurría llibros, artículos, comunicaos.. Y nós agora tamos con un ñudu nel corazón q nun nos dexa falar. ¡Cuánto te vamos echar en falta, compañeru!», apuntaben dende la Xunta pola Defensa de la Llingua Asturiana (XDLA), organización a la que dedicó gran parte del so llabor y esfuercios.
Tamién amosaben la so pena los sos compañeros d’Europa Press, onde llevaba dellos años trabayando. «Llamentamos fondamente’l fallecimientu del nuestru queríu amigu Damián, del que siempre recordaremos la so sonrisa, y unviamos el nuestu más sentíu pésame a los sos padres y hermanu por la perda terrible», incluyia l’axencia na nota na qu’informaba de la so muerte.
Barreiro, nacíu n’A Estrada nel 1984 pero residente n’Avilés, yera un referente del periodismu n’asturianu, dando los sos primeros pasos nes redaiciones d’Asturies.com y Les Noticies. Llicenciáu en Periodismu pola Universidá del País Vascu (UPV), máster en Xestión Cultural pola Universidá Oberta de Catalunya (UOC) y especialista universitariu en ‘Asturies. Espaciu, Patrimoniu, Historia y Cultura’ pola Universidá d’Uviéu, compaxinaba la realización de conteníos pa Europa Press Asturias y la so estaya d’asturianu col Anuariu de la Música Asturiana y otros trabayos de producción audiovisual.
Como escritor rescamplen los sos trés ensayos que merecieron el Premiu Máximo Fuertes Acevedo d’ensayu nos años 2014, 2018 y 2022: ‘Caleya Sésamu: el papel de la televisión na tresmisión interxeneracional de la llingua’, ‘Asturploitation’ y ‘Asturianía kitsch: decálogu de la cultura pop ástur’, de manera respeutiva. Ye l’únicu autor n’algamalu en trés ocasiones nes sos trenta ediciones.
Recuerdu nel CMCA
El Congresu Mundial de Cultura Asturiana (CMCA) que se ta celebrando estos díes nel Edificiu Históricu de la Universidá d’Uviéu, entamáu pola Academia de la Llingua Asturiana (ALLA), dedicó un minutu de silenciu a Barreiro y tien previsto entamar a lo llargo del día un homenaxe al avilesín. La institución amosaba en redes sociales el so «fondu pesar pola despidida tan temprana d’una persona comprometida y trabayadora que dexa un llabor por Asturies que nunca nun vamos escaecer». La so muerte causó conmoción ente los asistentes.
