‘Asturies ¿paraísu natural o paisaxe cultural? Dar visibilidá al paisanaxe dende l’arqueoloxía’ ye’l títulu de la conferencia mensual d’Ástura sobre cultura asturiana nel Atenéu Obreru de Xixón, cola caderalga d’Hestoria de la Universidá d’Uviéu como convidada
Les esperiencies atopaes pol grupu d’investigación arqueolóxica LLABOR (Llaboratoriu rural del paisaxe, hestoria y patrimoniu) nos xacimientos de Vigaña, Ḷḷinares y Los Fuexos, en Belmonte; Cueiru, en Teberga; y Andrúas, en Quirós, van ser espuestes pola so direutora, Margarita Fernández Mier, na conferencia ‘Asturies ¿paraísu natural o paisaxe cultural? Dar visibilidá al paisanaxe dende l’arqueoloxía’ dientro del ciclu de charres mensuales d’Ástura nel Atenéu Obreru de Xixón sobre cultura asturiana. Esti equipu d’investigación ta afitáu nel conceutu d’arqueoloxía agraria, metodoloxía entendida “tanto como una ferramienta p’averase a la conocencia de la hestoria de los paisaxes d’Asturies, como un emburrie pa reflexonar y discutir sobre cómo llograr que’l trabayu desendolcáu dende la investigación valga pa xenerar anovaes formes de xestión cultural”, apunten dende Ástura.
La caderalga d’Hestoria de la Universidá d’Uviéu va presentar na charra los resultaos algamaos nes campañes arqueolóxiques desendolcaes nel últimu deceniu nestos cinco llugares. “La fonda información qu’apurren estos trabayos dexa entender cómo se van aprovechando los distintos nichos ecolóxicos qu’ofrez el territoriu: dende les zones onde se sema’l pan a la xestión de los espacios comunales nes brañes”, rescamplen. La conferencia va ponese’l martes a les 19 hores nel llocal social del Atenéu, asitiáu na segunda planta de la Escuela de Comerciu, con entrada llibre hasta completar aforu.
