Los precios van dende los 75 euros a los 150 del sociu protector, con asientu a pie de pista y entrada de baldre al posible play-off; «la so vuelta nun ye sólo un fichaxe, ye un símbolu», afirma’l téunicu Nacho Galán sobre la incorporación del naviegu
Xixón torna esti añu a la tercer categoría del baloncestu estatal, la Segunda FEB, antigua LEB Plata, una categoría atractiva na que’l Círculo Gijón Noega Baloncesto quier consolidase depués de tres temporaes en Tercera FEB. L’ascensu na fase final celebrada nel Palaciu de Deportes en mayu y l’ambiente vivíu nos cuatro partíos sirve d’emburrión al proyeutu, que yá tien en marcha la so campaña d’abonaos con Javi Menéndez, primer fichaxe, como gran reclamu.
L’ala-pívot naviegu de 27 años torna al club, nel que militó dos años en LEB Plata, la 18-19 y la 19-20, depués d’una carrera desendolcada principalmente en Primera FEB (LEB Oro), categoría onde xugó la temporada pasada, en concreto nel Amics del Basquet Castellón, nel que promedió 6,3 puntos por partido y 5,5 rebotes en 19 minutos de xuegu, con una valoración media de 7,2. «Agora regresa a Xixón, non por falta d’ufiertes, que les tenía, tanto deportives como económiques, mui superiores a la de nueso, si non por una decisión xenerosa y valiente, y ye xusto dicilo. Apostó pol nuesu proyeutu, pola so ciudá y pol baloncestu como motor de la comunidá», apuntó ayeri’l téunicu Nacho Galán nun actu celebráu nel salón de receiciones de la Casa Conceyu. «La so vuelta nun ye sólo un fichaxe, ye un símbolu», añadió.
«Tengo ganes de ver a Gijón arriba. Tengo ganes de tener una bona temporada con Gijón, afianzanos por fin en Segunda FEB, que ye onde tien que tar, y a partir d’ehí, xubir p’arriba», declaró Menéndez, que recordó los tiempos d’ACB de la ciudá. “El mio oxetivu ye ver les graes enllenes como naquella época», dixo.
El presidente de la entidá, Carlos Rodellar, esplicó con detalle la campaña d’abonaos que yá ta en marcha. Los precios van dende los 75 euros p’adultos a los 150 del sociu protector, con asientu en pie de pista y accesu de baldre pa unos posibles play-offs, mentes que los xuveniles (de 13 a 17 años) han pagar 20 euros y los infantiles (menores de 12) siguen entrando de baldre al Palaciu. Úfrese tamién la opción d’un abonu familiar, con dos carnés adultos y dos xuveniles, por 150 euros, y el de cantera por 50 euros, al que tienen accesu les families de los xugadores de les categoríes inferiores. Los 100 primeros n’asociase al traviés de la web del club, hasta’l día 31, van recibir una camiseta conmemorativa de la fase d’ascensu, y na Feria Internacional de Muestres d’Asturies (FIDMA) va poder facese la renovación o alta de manera presencial.
«Queremos siguir creciendo n’asistencia de públicu al Palaciu, col compromisu d’un gran espectáculu dientro de la pista cola gran calidá de baloncestu que yá anticipo que va haber», apuntó’l dirixente, qu’esplicó que los abonaos van poder disfrutar «de 14 o 15 partíos oficiales nel Palaciu» ente la Segunda FEB y la Copa España, competición na que’l club debuta esta temporada. El conceyal de Deportes y Educación, Jorge Pañeda, confirmó pela so parte’l compromisu del Ayuntamiento pa col proyeutu del Círculo: «Fadremos un esfuerciu importante. Queremos apostar pol baloncestu y por que la xente vaya. Sabemos que Xixón tien afición, dende los 80 años, y cuando xubimos a ACB —en referencia al Gijón Baloncesto— , y queremos que vuelta a tar ilusionada».
