L’escritor tinetense, primer Premiu Nacional de Lliteratura Asturiana, finó esti martes a los 60 años por un aneurisma d’aorta que nun pudo superar nel quirófanu y dexa una bayurosa coleición d’obres, ente les que rescampla ‘Hestoria universal de Paniceiros’, y destacáu material audiovisual en forma d’entrevistes
Esti martes foi un día murniu pa la cultura y lliteratura asturiana, que vien llevando dellos golpes nos meses últimos. Xuan Bello, el so escritor más internacional, finaba ayeri nel quirófanu cuando taba siendo interveníu por un aneurisma d’aorta. Una muerte inesperada que-y llegó cuando tenía 60 años.
Nacíu nel 1965 en Paniceiros, una aldea de Tinéu que popularizó con su ‘Hestoria universal de Paniceiros’, el llibru que-y sirvió de trampolín pa dase a conocer fuera de les llende d’Asturies, onde yá yera un escritor punteru que destacaba como poeta. Espublizada nel 2002, la so torna al castellanu foi ampliamente reconocida y la obra llegó a otros idiomes, como’l catalán. Ensin dulda, el so gran referente, pero pal patrimoniu de los asturianos tamién dexa grandes obres: poemarios como ‘Nel cuartu mariellu’ (1982), la so primer obra escrita con namái 16 años na variante occidental del idioma, o ‘Les islles inciertes’ (2020); ensayos como ‘Cómo facer L’Habana ensin salir d’Asturies (1998); narrativa como ‘La hestoria tapecida’ (2008)’; y traducciones como’l llibru infantil ‘Bibiana y el so mundu’ (1989) de José Luis Olaizola o ‘Estancu y otros poemes’ (1989) del portugués Fernando Pessoa baxo’l so nomatu Álvaro de Campos, ente otros munchos llibros. Esta gran trayeutoria fixo que l’Academia de la Llingua Asturiana-y otorgase nel 2017 el primer Premiu Nacional de Lliteratura Asturiana.
Bello pasó bona parte de la so infancia en Veguín enantes de treslladase a vivir a la capital, onde finó ayeri. Amás de la so faceta d’escritor, tamién destacó como periodista y columnista, escribiendo en dellos medios, ente ellos ‘Les Noticies’, l’históricu selmanariu en llingua asturiana del que foi direutor. Nos últimos años foi una cara visible de TPA, onde realizaba entrevistes fondes a otros escritores y personalidades de la cultura en programes como ‘Clave de fondo’ y ‘La cocina de les lletres’. Amás, yera una persona mui activa en grupos de redes sociales de calter llingüísticu, onde compartía’l so saber con otros usuarios, y participaba de manera habitual n’actividaes lliteraries dientro y fuera d’España representando a la cultura y la llingua asturiana.
La so esquela ta encabezada pol so testu ‘Conozo un país onde’l mundu llámase Zarréu, Grandieḷḷa, Picu La Mouta… Paniceiros’, na que s’anuncia que la so despidida va ser esta tarde, a les 19 hores, na capiella del Tanatoriu Los Arenales, n’Uviéu. El funeral con cenices va tener llugar mañana a les 13.30 hores na parroquia de San Frichoso, nel so Paniceiros natal.
«Pilar fundamental sobre’l que s’ellevó la lliteratura y cultura asturiana»
Les reaiciones al conocese la muerte de Bello nun se fixeron esperar, tanto dientro como fuera d’Asturies. L’Academia de la Llingua Asturiana (ALLA), institución de la que yera académicu correspondiente, asoleyaba un comunicáu nel que destacaba «la importancia y trescendencia de la figura y obra de Xuan Bello pa les lletres asturianes y, poro, p’Asturies y pal so idioma». «Foi ún de los escritores más mozos que dieron los años ochenta n’Asturies y participó dende la so escritura lliteraria y periodística nos movimientos de recuperación, dignificación y universalización de la llingua de nueso», emponderaron.
El presidente d’Asturies, Adrián Barbón, «ablucáu entá pola muerte de Xuan Bello», declaraba que «namás tengo la fuercia pa escribir unes pallabres que nun son consuelu, sinón llantu. Asturies pierde a un de los dos meyores fios, amante de les sos llingües, cultura y tradiciones. Escritor esceicional y persona estraordinaria. Querémoste». Pela so parte, la conseyera de Cultura, Política Llingüística y Deporte, la tamién escritora Ana Vanessa Gutiérrez, confesaba tar «en shock y desbordada pola pérdida inesperada y prematura d’un queridísimu amigu, casi sin pallabres y capacidá pa ordenar nel pensamientu tantísimos recuerdos de toa una vida compartida, acierto a dicir que Xuan ye’l pilar fundamental y absolutamente insólitu, monumental, sobre’l que s’elevó la lliteratura y la cultura asturiana, con una altura de mires estraordinaria que nos afaló a toos. Centrando la vista nel corazón pa da-y una voz como nunca tuvo. Xuan ye. Y va a ser siempre».
L’edil Carlos Fernández Llaneza, en nome del PSOE d’Uviéu, partíu pol que la muyer de Bello, Sonia Fidalgo, ye conceyala, apunta que «se va Xuan, el escritor reconocido. Se va el intelectual comprometido. Se va el hombre que, desde su Paniceiros natal, se sintió orgulloso de ser un asturiano universal. Se va esa voz que tan bien retrató la Asturias íntima. Profunda. Se va el defensor incansable de ese patrimonio tan nuestro que es el asturiano. Pero, sobre todo, se va quien, para muchas personas, fue un amigo del alma. Se va un padre. Y se va un marido. Corrijo: no se va. Su obra y su recuerdo perduran. ¡Y de qué manera!».
Dende’l Partido Popular (PP), el so presidente Álvaro Queipo apuntó que «recibo con tristeza la noticia de la muerte repentina del escritor Xuan Bello, una de las firmas más destacadas en lengua asturiana de la literatura contemporánea. Su obra perdurará como un testimonio de su talento y sensibilidad».
La Xunta pola Defensa de la Llingua Asturiana (XDLA), de la que foi fundador, espresó que «Asturies pierde a ún de los sos meyores escritores. Y la Xunta pierde un amigu». «Dedicóse dafechu a la lliteratura y el periodismu, pero siempre nos echó un gabitu cuando lu llamemos», valoraron dende la organización a lo poco de conocer la triste noticia.
La Feria Internacional de Muestres d’Asturies (FIDMA), qu’arranca esti sábadu en Xixón, va recordar a Bello de la mano d’Iniciativa pol Asturianu, qu’anunciaba que nel IV Día de la Llingua Asturiana, que va tener llugar el 16 d’agostu, va entamar un homenaxe al autor. Asina, van proponer una llectura a micrófonu abiertu de la obra ‘Hestoria Universal de Paniceiros’ «pa espardir la so obra cimera faciendo partícipe a tola sociedá». El coleutivu declaró que la perda del escritor «xenera un vacíu irremplazable en el ámbitu cultural y lliterariu asturianu».
