El miércoles celebróse un actu nel Tanatoriu Los Arenales al qu’acudió’l presidente Adrián Barbón y representantes del mundu de la cultura d’Asturies; esti xueves la parroquia de San Frichoso va acoyer un eventu más íntimu en memoria del autor más reconocíu de les lletres asturianes
La muerte de sópitu de Xuan Bello a los 60 años dexó fría a Asturies la tarde del martes. Ayeri, collacios y representantes del mundu de la cultura averáronse al uvieín Tanatoriu Los Arenales al actu de despidida celebráu tamién de tarde, 24 hores depués de que la noticia corriera como la pólvora al traviés de llamaes y mensaxes de testu, p’acompañar a Sonia Fidalgo y familia en tan duros momentos y mostrar los sos respetos al escritor más internacional de les lletres asturianes. Tamién les autoridaes, como’l presidente Adrián Barbón; la vicepresidenta Gimena Llamedo; la conseyera de Cultura, Política Llingüística y Deporte, Ana Vanessa Gutiérrez, visiblemente afeutada pola so cercanía col autor de Paniceiros; Antón García, direutor xeneral d’Aición Cultural y Planificación Llingüística; o el conseyeru d’Ordenación de Territorio, Urbanismo, Vivienda y Derechos Ciudadanos, Ovidio Zapico.
Xosé Antón González Riaño, Pablo Rodríguez Medina, Berta Piñán, Ramón d’Andrés, Amelia Valcárcel, Ignacio Villaverde, Xune Elipe, Xuan Xosé Sánchez Vicente, Chus Pedro, Marisa Valle Roso, Xosé Antón Fernández ‘Ambás’, Ramón Lluís Bande… Nun faltó práuticamente naide del mundu de la cultura d’Asturies nun actu nel que la pallabra, como nun podía ser d’otra manera, tuvo muncha presencia. Güei, a les 13.30 hores, la familia va despidir a Bello nun funeral con cenices nel so Paniceiros natal, na parroquia de San Frichoso.
