L’espaciu bate récor d’empreses y ufierta actividaes diares pa tolos públicos, dende presentaciones de llibros a tasties
Iniciativa pol Asturianu presenta nesta edición de la Feria Internacional de Muestres d’Asturies (FIMDA) un espaciu que bate récord d’empreses participantes. Firmes de sectores como moda, agroalimentación, artesanía, edición, telefonía o deporte van acompañar a la organización pa visibilizar l’usu del asturianu como elementu de valor económicu y social. Son nesta edición Acuto Xuegos, Al Otru Andar, Arte Yunastur, Asociación d’Escritores d’Asturies, Díes Adulces, Cartonaxes VIR, Chigre La Tortuga, Círculo Gijón Noega Baloncestu, Cuatro Gotes Producciones, Ediciones Radagast, Ediciones Trabe, Cerveza Caleya, La Fabriquina, La Semeya Editorial, Nordés Móvil Telefonía, Panduru, Pintar-Pintar, Puru Remangu, Quesería Ca Sanchu, Ringo Rango y Tiza y Peonza.
Amás del escaparate empresarial, el puestu acueye actividaes diaries, siempre a les 18.30 hores: güei, la presentación de Tiempu de nós, con Raúl Alonso; mañana, presencia de l’asociación de deporte y ociu Faciendo Camín; el martes, presentación del númberu 32 de VerAsturies; el miércoles, llibros y recital de Diego Solís; el xueves, presentación de la novela Xiblón. Menudu Putiferiu con María Esther García López (nesti casu va tener llugar a les 19 hores); el vienres, l’antoloxía poética Surdiversu. El sábadu va celebrase’l IV Día de la Llingua Asturiana na FIDMA, xornada na que va entamase un homenaxe a Xuan Bello y una llectura abierta de Hestoria universal de Paniceiros (13 hores). Na última xornada de la FIDMA, el domingu a les 18.30 hores, va celebrase una tastia de cerveza artesano asturiana.
Baxo’l lema Asóciate y lleva un llibru, la organización busca tamién sumar persones socies. Les altes nueves van recibir un Diccionariu d’asturianu. El puestu d’Iniciativa pol Asturianu ta nel pabellón 3-4 del Palaciu de Congresos, nel espaciu númberu 14.
