El decretu pa incluyir l’enseñu del idioma nesta etapa va tar pa «los díes últimos d’agostu o los primeros de setiembre», confirmó la conseyera Eva Ledo llueu d’una xunta col presidente de l’Academia de la Llingua Asturiana (ALLA), Xosé Antón González Riaño, al que treslladó que va solicitar al ministeriu la especialidá docente
Eva Ledo recibió na mañana d’ayeri na sede de la conseyería d’Educación a Xosé Antón González Riaño, presidente de l’Academia de la Llingua Asturiana (ALLA), primer alcuentru oficial cola institución dende que garrara’l relevu de Lydia Espina al frente del departamentu llueu de la so dimisión nel contestu de la fuelga educativa de xunu. Un conceyu «cordial, agradable, distendíu y, sobre manera, mui constructivu», apuntó l’avilesina a la salida, que tuvo acompañada por María Dolores Bueno, direutora xeneral d’Inclusión Educativa y Ordenación.
Ente los temes trataos tuvo la inclusión esti cursu de la Llingua Asturiana y l’Eonaviego nel segundu ciclu d’Infantil (3 a 6 años), en concreto na área de ‘Comunicación y representación de la realidad’, escoyeta de calter voluntariu pa les families y impartición d’ufierta obligada pa los centros. La modificación del decretu que lo afita «va ver la lluz próximamente», confirmó Ledo, que marcó como fecha pa ello «los díes últimos d’agostu o los primeros de setiembre». Educación informó que, llueu d’un primer sondéu fechu nos centros d’enseñu, la matriculación supera el 60 % ente los escolinos de centros públicos.
Falóse tamién na xunta de «la necesidá de promocionar la llingua asturiana y l’eonaviego nes aules» y decidióse «caltener una llinia de collaboración cercana en rellación a les llistes de profesoráu pa mantener siempre una disponibilidá de docentes pa impartir estes llingües, que nun siempre ye fácil pola escasez de docentes nestes materies». Otra manera, van divulgase materiales pedagóxicos pal enseñu de los dos idiomas propios.
Falta d’oficialidá
El bloquéu dende’l Ministeriu d’Educación, Formación Profesional y Deportes de la creación de la especialidá docente de Llingua Asturiana y Eonaviego, cola escusa de que los dos idiomes nun son oficiales, aldericóse tamién nel alcuentru. Nesi sen, Ledo apuntó que va insistir en Madrid con ello, un compromisu que forma parte del pautu ‘Asturies Educa’, firmáu pol Gobiernu con CCOO Enseñanza, SUATEA, ANPE Asturias y UXT Servicios Públicos, que sirvió pa poner fin a la fuelga educativa vivida a final del cursu. Ésta ye una reclamación del sector educativu dende va décades que’l Gobiernu fixu suya per primer vegada nel 2001 pa dar estabilidá a los docentes qu’imparten la materia d’asturianu y eonaviego o gallego-asturiano, agora en desigualdá de condiciones con respeuto a los sos compañeros.
