El programa d’enseñanza non reglada p’adultos de baldre qu’entama’l Gobiernu en collaboración con la Federación Asturiana de Conceyos (FACC), pol que yá pasaron 1.410 alumnos, presenta opciones de nivel básicu y intermediu en llingua asturiana, y lleva clases de gallego-asturiano fuera del occidente
Foi en mayu cuando arrancó la cuarta edición de ‘Falamos’, l’esitosu programa d’enseñanza non reglada p’adultos, como amuesen los 1.410 alumnos que se formaron con él dende’l 2022, cuando nació pa permitir a los ciudadanos garrar nociones básiques d’asturianu o eonaviego, o ameyorar el so nivel. Arrancó en mayu n’Uviéu con un cursu básicu y otru intermediu de llingua asturiana, que va repetise dende’l 3 de payares pa da-y continuidá a los participantes nel primeru, y va siguir en setiembre con otros 10 en diferentes puntos d’Asturies y 3 del idioma del occidente, ente los que rescampla’l que s’entama n’Avilés dende’l 10 de setiembre, el primeru que s’imparte de gallego-asturiano fuera del Eo-Navia dientro d’esta iniciativa del Gobiernu en collaboración con la Federación Asturiana de Conceyos (FACC).
La conseyera de Cultura, Política Llingüística y Deporte, Ana Vanessa Gutiérrez, y la presidenta de la FACC, Cecilia Pérez Sánchez, presentaron ayeri la propuesta para 2025 nel pabellón del Executivu na Feria Internacional de Muestres d’Asturies (FIDMA) nel marcu del IV Día de la Llingua Asturiana na FIDMA. Sotu’l Barcu (entamu’l 9 de setiembre) y Villaviciosa (23 de setiembre) van acoyer los cursos de nivel básicu d’asturianu, mentes que los d’intermediu van ponese en Les Regueres (1 de setiembre), Grau (3 de setiembre), Avilés (9 de setiembre), Mieres (10 de setiembre), Carreño (11 de setiembre), Samartín del Rei Aurelio (29 d’ochobre), Uviéu (3 de payares) y Corvera (6 de payares).
No que respeuta al eonaviego, los trés van ser nivel básicu: Bual (9 de setiembre), Avilés (10 de setiembre) y Castropol (4 de payares.) Tolos cursos van ser semipresenciales, con una duración de 42 hores, de les que 20 van ser de forma física y 22 en llinia. La so inscripción pue tramitase de baldre al traviés d’esti enllaz.
Amás, va incorporase a la ufierta un cursu en llinia d’iniciación al asturianu de 20 hores de llargor —hasta’l momentu taben disponibles dos de 30 hores d’asturianu y eonaviegu básicos— y un xuegu interactivu d’autoevaluación pa midir el conocimientu d’entrambes llingües. «Con esta trayeutoria, ‘Falamos’ consolidóse como una ferramienta eficaz pa la promoción de les llingües propies d’Asturies, combinando la cercanía de la formación semipresencial coles posibilidaes del deprendizaxe dixital», apuntó l’alcaldesa d’El Franco na presentación, mentes que Gutiérrez señaló qu’esta iniciativa «ye fundamental, una demanda qu’atendemos porque la ciudadanía asina lo pidía». La primer edición foi la que contó con más alumnos, 920 participantes en 56 cursos semipresenciales en 35 conceyos, y nel 2023 incorporóse la formación en llinia que permitió l’accesu al programa de persones d’otros puntos de España, Llatinoamérica y países tan llonxanos como Australia, principalmente emigrantes.
