Vivimos tiempos nos que los malos se desinhiben y tán menos dispuestos cada vez a pagar esi «homenaxe que’l viciu rinde a la virtú» que se diz que ye la hipocresía. Son tresparentes, tresparenten la so maldá
Tien Mauro Entrialgo un ensayín, espublizáu por Capitán Swing, que se titula Malismo. La palabra fai referencia «al mecanismu propagandístico antiintuitivu que consiste na ostentación pública d’acciones o deseos tradicionalmente reprobables cola finalidá de consiguir un beneficiu social, electoral o comercial». ¿Exemplos? Milenta. Begoña Villacís sacando una semeya énte’l valtamientu de la infravivienda d’una familia ensin llar ye unu, la frivolidá con daqué bien serio del «que te vote Txapote» ye otru. Pero Entrialgo nun los busca namás na política. Hai un capítulu que se titula «El canal de Telegram de tus propios crímenes. La moda de grabar tus delitos solo por gusto o para presumir ante los colegas». Acaba morrer en Francia un streamer, Raphaël Graven, que llograra la so fama dexándose escalabrar en directu, a pidimientu de los espectadores: palices, insultos, disparos con pelotes de paintball. N’España tenemos l’exemplu dalgo más suave, pero non muncho, de Silvia Charro y Simón Pérez, que tamién moneticen los sos propios escalabros, a pidimientu del (non) respetable: beber la so orina, consumir drogues d’una manera determinada, disfrazase de coses humildantes, tatuase fataes o faltar a otres persones pela cai. Los sos espectadores nun son un puñáu piquiñín de malnacíos escéntricos, de los qu’hai siempres en cualquier sociedá: si puede vivise d’esto, ye que son porque son decenes, cientos de miles.
Vivimos tiempos nos que los malos se desinhiben y tán menos dispuestos cada vez a pagar esi «homenaxe que’l viciu rinde a la virtú» que se diz que ye la hipocresía. Son tresparentes, tresparenten la so maldá. Los exemplos más duros atalantámoslos toos. La insurxencia ultraderechista que percuerre’l mundu como la pantasma proverbial ye’l síntoma más evidente. Pero los capítulos del llibru que yo quería traer equí son otros. Unu titúlase «Comunicación comercial malista. Cómo vender servicios y productos sin dejar de insultar a tu posible clientela». L’autor escomencípialu mentando l’exemplu paradigmáticu de Ryanair, conocíu pola so estratexa pintoresca en redes, que consiste en bromiar coles incomodidaes característiques de los sos vuelos baratos. Responder, por casu, a un cliente que protesta nun tuit pel perangostu espaciu del que dispón nun avión diciéndo-y: «A doblar les piernes».
L’otru capítulu ye «Naming malista. La tendencia a denominar productos, pertenencias o establecimientos comerciales con nombres que celebran el mal». A Entrialgo llamába-y l’atención la cantidá de brandings d’esti tipu qu’empezó a atopase per Madrid: esos sitios que se llamen Vandido, Clandestino, El Burro Canalla, El Embaucador, La Peligrosa, La Malcriada, El Perro Gamberro, La Infame, etcétera, etcétera. La moda del canallita y de lo canalla vien pisando fuerte, en Madrid y más allá de la metrópolis ayusista. Como escribe Mauro, «entrañables denominaciones comerciales como la del vino Honorable de las bodegas Gómez Cruzado de Haro, la desaparecida corsetería-lencería La Positiva del Paseo de Delicias de Madrid o la bodega La Servicial Vinícola de Pamplona se perciben para el gusto contemporáneo ridículamente anacrónicas por demasiado cándidas». Nel centru de Xixón abrió hai pocu tiempu una hamburguesería —una de les diez mil qu’abrieron últimamente— con un cartelu grande de neón que diz: «Aquí también nos gustan maduritas». En Astorga yo atopé apocayá, y pasé-ylu a Mauro, un cartelu que dicía: «Descubre en la semana del queso nuestra hamburguesa más canalla». Llamábase Bomba Burger.
Llamar El Perru Gamberru a un garitu o iguar hamburgueses d’onomástica terrorista paecen coses muncho menos graves que matar a un influencer en directu, porque lo son. Pero hai un filu que conecta dambos sucesos; dambos son posiciones del mesmu espectru, estremos del mesmu pel llau de lo más trivial y pel de lo más serio: el regresu del Mal. Yera bono qu’el Bien fora poniéndose les piles.
