«Nun se puede perder más tiempu en recursos; ye’l momentu de llograr un alcuerdu municipal p’aprobar nel menor tiempu posible un plan que s’axuste a los requisitos llegales», valora la organización, mesma postura que caltién el PSOE, énte l’anulación del actual pol so procedimientu de tramitación, non pol so conteníu
La ratificación per parte del Tribunal Superior de Xusticia d’Asturies (TSXA), énte’l recursu d’apelación presentáu pol Conceyu, de la sentencia del Xulgáu Contenciosu Alministrativu númberu 1 qu’anulaba’l Plan de Normalización Llingüística de Xixón correspondiente al periodu 2024-2027 lleva a Iniciativa pol Asturianu a insistir na retramitación del documentu. «Nun se puede perder más tiempu en recursos; ye’l momentu de llograr un alcuerdu municipal p’aprobar nel menor tiempu posible un plan que s’axuste a los requisitos llegales», apunta la organización, que reclama «axilidá» al Ayuntamientu.
Ye la mesma postura que caltuvo Iniciativa cuando en mayu diose a conocer la sentencia del xulgáu xixonés énte un recursu presentáu por Vox siete meses enantes y la que vien defiendiendo tamién el PSOE, partíu que s’astuvo nel Plenu del 14 de mayu nel que s’aprobó recurrir el fallu énte’l TSXA. «Lo que’l Gobiernu municipal fixo al recurrir la sentencia ye debilitar el plan, dando-y fuercia orientadora y non de norma xurídica», opinó ayeri’l conceyal José Ramón Tuero, qu’asegura que la solución al problema ye «tramitar un plan nuevu correutamente, como esixe la llei».
La sentencia apuntaba a la falta d’informe económicu, la omisión del procedimientu llegalmente afitáu por falta de consulta pública previa, la falta d’espublización del testu nel portal web, de publicación de les memories y informes que conformen los espedientes d’ellaboración de los testos normativos, la falta d’intervención de la Xunta de Gobiernu Llocal, el pasu direutu del proyeutu informáu pol Conseyu Asesor a l’aprobación y la so non inclusión nel Plan Anual Normativu, esto ye, el procedimientu emplegáu, como los motivos pa la so anulación, pero nunca punxo en cuestión el so conteníu, lo que fai vidable la retramitación del documentu. «La sentencia afala claramente al reconocimientu xurídicu de la llingua asturiana, recalcando que los Planes de Normalización Llingüística tienen un calter normativu; esto significa que son normes qu’hai que cumplir y llevar alantre», apunta la presidenta d’Iniciativa pol Asturianu, Arantza Margolles.
Pasos atrás nel usu del idioma
La historiadora denuncia que «demientres s’anula’l Plan, se recurre y se pierde más tiempu con estes cuestiones llegales, en Xixón siguen los pasos atrás» col idioma. «Mesmamente, a piques d’entamar la Nueche Blanca 2025, una xornada vinculada a la cultura, esti eventu nun cuenta con nenguna actividá n’asturianu. La preocupación que tenemos sobre la presencia del asturianu nel conceyu de Xixón va medrando porque tamos viendo pasos atrás y siguimos perdiendo’l tiempu con recursos sobre un Plan de Normalización anuláu; frente a estratexes efectives como l’aprobación d’un nuevu documentu», insiste. La desapaición del idioma na programación musical de la Selmana Grande, na cartelería de la Fiesta de la Sidra y na interpretación de la Danza Prima del día 15 d’agostu foron dalgunes cuestiones denunciaes recién pola organización.
Otra manera, Vox afirmó ayeri, de boca de la so única conceyala, Sara Concepción Álvarez Rouco, que «el Conceyu de Xixón pretendió imponer de facto la oficialidá de la llingua, saltándose los más elementales controles de llegalidá» col Plan de Normalización Llingüística del periodu 2024-2027. Tamién reclamó’l desaniciu de la Oficina de Normalización Llingüística, estaya que lleva dando serviciu a la ciudadanía dende’l 2004.
