La emisora alternativa qu’emite dende El Polígono cumple cuatro décades desque entamó en Cimavilla y va celebralo los díes primeros d’ochobre con una serie d’actividaes ente les que rescampla un gran festival na sala Acapulco cola participación d’una decena de grupos y artistes asturianos
L’asociación Colectivo Radiofónico Asturiano, conocida como Radio Kras, ye parte de la historia de la radio asturiana. Los sos micrófonos dieron voz dende los sos entamos a toles persones con daqué que dicir, convirtiéndose nun altavoz pa movimientos sociales, asina como pa les músiques que nun reciben espaciu nes emisores comerciales. Una ferramienta clave pa munchos mozos y non tan mozos qu’esti mes d’ochobre celebra los sos 40 años de radio alternativa en Xixón pel 105.0 de la FM, primero dende Cimavilla y yá dende los 90 n’El Polígono, con un ampliu programa que va contar con un conciertu na sala Acapulco con nomes como Rodrigo Cuevas, Dixebra, Rafa Kas, Antón Menchaca o Mostru l’Horru, ente otros.
La presentación de tola programación y la prefiesta del aniversariu va tener llugar el vienres en La Caja de Músicos a les 21 hores nuna folixa con pinchaes de Marabayu, Vericuetos y Ximiélgalo, mentes qu’al día siguiente, a les 10 hores, va entamase una maratón radiofónica de 40 hores d’emisión ininterrumpida cola participación de los programes producíos por Radio Kras y convidaos especiales. Yá la selmana siguiente, el vienres 10 d’ochobre, va celebrase’l FestiKras cola participación de diez bandes y artistes asturianos de diferentes estilos y entraes yá a la venta por 5 euros en La Revoltosa, Paradiso, Páramo Bar, Bambi, el 4.70 o San Rafael.
Nesta gran celebración pol cuarentenu aniversariu de Radio Kras va tar presente Rodrigo Cuevas, ún de los músicos asturianos más internacionales d’anguaño, que va compartir cartelu con otros nomes importantes de la escena, como Dixebra o’l guitarrista Rafa Kas. In Campo Aperto, Campeador, Antón Menchaca, Herr Manos, Soul Fiends, Mostru l’Horru y Lea Poldo van tar tamién nel escenariu de la sala Acapulco, que va abrir les sos puertes a les 21 hores, media hora enantes del entamu de les actuaciones.
Nel festival tamién se van entregar los premios del concursu ‘Tu voz, tu historia’ entamáu con motivu del aniversariu de Radio Kras, que continuará nos meses próximos con más actividaes culturales na ciudá entovía por confirmar. Ésti convidó a crear conteníos radiofónicos al traviés de podcasts narrativos, microteatru radiofónicu o cantares, poemes o microrrellatos sobre temátiques habituales na parrilla de la emisora.
