POR BORJA PINO Y PABLO R. GUARDADO
El dibuxante llangreanu perfílase como ún de los grandes nomes de la historieta autóctona con obres como ‘Ana María, la llobera’, Premiu Alfonso Iglesias de cómic; ‘Cumbres en pie de guerra’, la so creación última, sigue acumulando eloxos
Asturies ye una tierra percorrida por cicatrices, marcada pa siempres por tantos y tantos acontecimientos difíciles del pasáu, más o menos llonxanu, que contribuyeron a forxar la so identidá. Y una de les firíes más recientes, en fase de curación pero entá gúei supurante a veces, foi la qu’abrió la desindustrialización de les cuenques. Cuasi de la nueche a la mañana, una zona que per sieglos prosperara gracies a la minería y a la industria vio los sos pozos cegaos, les sos factoríes pesllaes y a miles de familias obligaes a reconvertise pa sobrevivir nun mundu cambiante. Guillermo Menéndez Quirós (Llangréu, 1994) creció al calor d’esi procesu… Y, conscientemente o non, pudo saca-y un provechu. Nacíu y criáu al calor d’aquellos cambios, la esperiencia fixo medrar nél un compromisu social y una defensa radical de la so rexón que, combinaos cola so pasión pol dibuxu, convirtieron-y non sólo nún de los incipientes ‘grandes’ del cómic autóctonu… Tamién nún guardián auténticu de delles de les tradiciones, lleendes, espresiones culturales y histories del Principáu, conteníes n’obres como ‘Cumbres en pie de guerra’, el so últimu ésitu. Tou un reblagu pa un mozu que yá nel 2022 ganó’l favor de la crítica cuando ‘Ana María, la llobera d’Asturies’ llevó’l Premiu Alfonso Iglesias de cómic.
«Siempre digo que soi productu d’esa desindustrialización, d’esa última xeneración de la cuenca que tuvo a mediu camín ente la vida industrial y minera, y el pieslle total del 2012; eso marcóme enforma», rememora. El que la so familia tuviera mui implicada nes lluches sociales del momentu, naquella solidaridá que dominó los intentos por torgar, primero, y demorar, depués, el procesu de cambiu tamién sumaron a esa definición de la so personalidá, proporcionándo-y un bagaxe oral del que «la mio tía foi la gran guardiana». Pero non too aquello no que Quirós se convirtió bebe d’aquel periodu… Paralelamente, yá na so infancia xestó y maduró nel so interior un amor pola historia, más allá de la del sieglu XX, y pol folclor asturianu qu’alimentó dalgunos de los sos trabayos más reconocíos. La premiada ‘Ana María, la llobera d’Asturies’, col so rescate de la figura de la curandera del sieglu XVII Ana María García, o ‘Leonardo: la epopeya’, la so primer espublización, fecha col Conceyu de Llangréu y que recurre al costumismu del llugar pa nutrir l’humor del absurdu, dan fe d’ello. Por nun falar, claro, de ‘Cumbres en pie de guerra’, un rellatu de la tráxica batalla d’El Mazucu que tuvo llugar na Guerra Civil Española, o de ‘Milicias vascas antifascistas’, criatura na que, amás del so interés pola historia, queda patente la que ye otra de les sos influencies: Bilbao, la ciudá na que completó los sos estudios d’Arte y na que residió per ocho años.
«Hai muncho de too ello nel mio trabayu: de la cuenca, d’onde soi; del oriente asturianu, contra’l que siempre tendí pola mio familia materna y con paisaxes que tán presentes nos mios cómics; de Bilbao, claro…», rellata Quirós, recordando con tenrura que’l so aval, los sos primeros pasos, ta recoyíu en «los manteles de papel de los chigres, nos que dibuxé desde que yera nenu». Aquellos foron los primeros pasos artísticos d’un estilu que, colos años y la práutica, llegaron a demostrar influencies nidies del cómic underground, condimentaes con notes dignes del francés Jacques Tardi, pero ensin perder esa autenticidá que yá se percibía nos retales d’aquellos manteles. Y nun fai falta insistir, a la vista de la so trayeutoria, na importancia qu’Asturies tien nel so llabor, un aspeuto que se detecta, inclusive, nel usu de los idiomes. «Tanto ‘Leonardo…’ como ‘Ana María…’ son obres n’asturianu dafechu; la segunda, amás, nun asturianu oriental concretu, mui axustáu al personaxe», esplica l’autor. Tamién en ‘Cumbres en pie de guerra’ la llingua autóctona xuega un rol destacáu, anque «ye menos integral; hai personaxes que la empleguen, otros que non… Paecióme importante facelo asina pola variedá de personaxes, y pa que nun hubiese problemes a la hora de que saliese de les nueses llendes». Una apuesta que, al paecer, resultó ganadora; con cuasi tolos exemplares vendíos, la mayoría de crítiques coinciden en que esa escoyeta «da autenticidá y realismu» al conxuntu.
Llegaos a esti puntu, ye fácil intuyir qu’un amante del pasáu y de la cultura de la rexón como Quirós s’allinia colos que defenden la oficialidá del asturianu… Y, efeutivamente, asina ye, anque nel so discursu nun hai res de fanatismu, y sí muncho de sanu realismu. «A min me paez que la llingua ha tener un papel relevante na vida cultural; nun dexa de ser política, pero creo que la xente tiene que tener derechu a espresase na so llingua y que, de dalguna manera, se-y tien que dar la opción d’exercer esi derechu», argumenta. La so entovía breve presencia nel mercáu editorial, y el que la de so sía una visión mui acotada al terrén del cómic, disuaden-y a la hora d’opinar sobre si l’usu del asturianu ye bien acoyíu, o non, pol públicu llector. Lo que sí tien claro ye que la presencia de la llingua autóctona en creaciones lliteraries ye un camín que difícilmente va pesllase. «Tolo que tenga que ver cola nuesa cultura hai que potencialo, cuidalo y intentar qu’evolucione», plantega. Una idea de fondu qu’alimenta la so despidida, mientras piensa en proyeutos futuros, como una fusión de cómic con serigrafía, o la posible ellaboración d’un capítulu de pieslle pal final abiertu de ‘Cumbres en pie de guerra’: «la de la cultura ye la mio postura, en definitiva. Asina que, dende la trinchera de la cultura… ¡A tope col asturianu”».
