El llunes conmemórase esta xornada y dende esta iniciativa mensual qu’enllena la Plaza Mayor de puestos entámase una programación especial con actividaes como teatru, poesía, talleres o cuentacuentos dende’l sábadu hasta’l mesmu llunes, día nel que Xosefa Xovellanos va visitar el llugar
El Mercáu Artesanu y Ecolóxicu instálase esti ochobre dende güei al llunes, ampliándose asina un día aprovechando’l festivu del Pilar, qu’al cayer en domingu pasa a la xornada siguiente n’Asturies. Una ponte vacacional que coincide tamién col Día de les Escritores, iniciativa de la Biblioteca Nacional de España que l’espaciu que tien na Plaza Mayor como sede vien conmemorando estos años últimos. Asina, baxo’l nome ‘Pallabra de Muyer’ entama actividaes como teatru, poesía, talleres o cuentacuentos estos trés díes cola fin de dar «protagonismu a la lliteratura escrita por muyeres y, sobre manera, n’asturianu». El lema emplegáu esti añu ye ‘El silenciu ábrese con tinta. ¡Escribíi, compañeres!’, una revisión propia del eslogan oficial del Día de les Escritores del 2025, ‘1975: ¡Escribiíi, compañeres!’, y el símbolu, una pluma d’ave, que representa la escritura, cola punta que se tresforma nuna llave recordando que «cada pallabra escrita tien el poder d’abrir caminos hacia la memoria, la llibertá y la igualdá».
El llunes, cuando ta anunciada pa les 13 hores la visita teatralizada de Xosefa Xovellanos, una de les más renomaes autores en llingua asturiana, va tener llugar la mayor parte d’elles, esti día entames en comuña cola Fundación Municipal de Cultura, Universidá Popular y Educación como parte de la programación del ‘Ente Fueyes. Ochobre Lliterariu’. Sergio Buelga va a poner un cuentacuentos a les 18 hores y tán programaos dos talleres, de 12 a 14 y de 17 a 19.30 hores, sobre la figura de la hermana de Gaspar Melchor de Xovellanos.
Amás, nos trés díes el visitante va atopar «propuestes creatives que conviden a descubrir la voz femenina na pallabra y na creación», como ‘Tocar na pallabra’, esta tarde na carpa de 17 a 20 hores, nel que l’artesana testil, Sheila Gervasoni; l’actriz y directora teatral, Anacelia Álvarez; y la violinista y cantante, Mónica Acevedo, van xuntar les sos voces y talentos pa dar vida a poemes escritos por muyeres de tolos tiempos y llugares. Güei (de 12 a 15 hores) y mañana (de 17 a 20 hores), mientres, dos llibreríes de Xixón van compartir una escoyeta de títulos pensada con procuru, averando propuestes diverses y actuales que conviden a descubrir nueves autores y rellatos baxo’l nome de ‘Llibros que nos acompañen’.
Otra manera, mañana, a les 13 hores, nel marcu de Danza Xixón, se pondrá en escena la pieza ‘Lo que los árboles no cuentan’, d’Héctor Plaza y Kiko López. El Mercáu Artesanu y Ecolóxicu va tar abiertu de 11 a 15 y de 17 a 21 hores, anque’l llunes va pesllar una hora enantes, a les 20.
Aniversariu de la muerte de Teresa de Xesús
El Día de les Escritores vien conmemoránose dende’l 2016 el llunes más cercanu al 15 d’ochobre, aniversariu de la muerte de Teresa de Xesús. Son numberoses les iniciatives entamaes alredor d’esta fecha en tol Estáu pa «reivindicar el llabor y el llegáu lliterariu de les muyeres, tantes veces relegaes a un segundu planu a lo llargo de la historia».
