La Banda Gaites Villa de Xixón, que participó na ‘Selmana d’Asturies’ del pabellón d’España p’amosar la música tradicional asturiana, llamó l’atención del públicu xaponés, que s’atrevió a entamar una danza
La presencia asturiana na Esposición Universal d’Osaka dexó buelga, como dexa ver la interpretación del himnu d’Asturies per parte de los miembros de la Banda Gaites Villa de Xixón desplazaos a Xapón pa dar a conocer la música tradicional asturiana nel marcu de la ‘Selmana d’Asturies’ del pabellón d’España. Ésti sonó en delles ocasiones estos díes del certame que finó ayeri, pero la última interpretación foi enforma especial, lo que llevó a l’agrupación a compartir el videu nes sos redes sociales.
Nél pue vese a munchu públicu y a un grupu de xaponeses entellazaos faciendo corru y entamando daqué asemeyao a una danza colos primeros acordes del ‘Asturies, patria querida’ frente al espectacular pabellón español na Esposición Universal. Un momentu que quedará pa siempres na memoria de los músicos y de los presentes.
