Iker García Suárez ye un xugador de pool formáu nel Serendipity que pisa fuerte nesti deporte, hasta’l puntu de clasificase pa competir n’Estaos Xuníos nel so primer añu como xugador; “necesítase muncha disciplina”, confiesa’l mozu
El billar ye un deporte en crecimientu n’Asturies. Son munchos los xugadores que participen nes diferentes competiciones entamaes nel territoriu y mediu centenar viaxaron en Zaragoza n’agostu pa participar nel Campeonato Nacional Pool Tour 2025, ente ellos Iker García Suárez, una de les mayores promeses d’esta disciplina. Xixonés de 16 años, debutó como xugador l’añu pasáu, completando magar la so mocedá una temporada espectacular que finó cola so clasificación al Mundial de Pool de Las Vegas de febreru na final del Ranking Asturiano de Pool de la so categoría na final celebrada en xunu nel Centru Comercial Los Fresnos.
«Dende pequeñu xugaba nes meses de los bares colos mios amigos y colos mios padres, y el mio tíu, Roberto Suárez Fernández, que tien un bar de billares, el Serendipity, deprendióme a xugar. Mercóme un tacu y enseñóme los tiros básicos», esplica García Suárez. Una formación qu’entamó a los sos 13 años, anque la competición nun la empezaría hasta l’añu pasáu, con 15, cola inscripción nel Raking Asturiano de Pool d’Expósito, de mesa pequeña, que-y dio’l pase al Campeonato Asturias de Pool que repartía les places pa Las Vegas. «Empecé na categoría bronce, como suel facer la mayoría. Anque yo nun compitiera enantes, sí venía con una base yá de xugar y el mio nivel diome pa llegar a la final del tornéu», rellata.
Yeren ocho los xugadores que clasificaben nel so nivel, con cuatro viaxes a la popular ciudá del estáu de Nevada pal Mundial en xuegu. «La última recta del ranking, que yera la que decidía en qué parte del cuadro empezaba, dióseme mui mal. Nun consiguí ganar y vía que nun diba salir bien. Quedé penúltimu de los ocho, asina que fui a la parte del cuadru nel que me tocaba batallar. Nun tenía les meyores sensaciones, pero sabía que si taba ehí yera por dalgo. Entós, xugué lo que meyor que pude y en primera ronda consiguí remontar un 3-5 pa ganar con 7-5 y evitar los penaltis (empate a 6)», rememora sobre’l so enfrentamientu con Víctor Roda en primera ronda.
Quedaba la partida decisiva pa ganar el viaxe, con Antonio Ortega, que llegaba del cuadrante de ganadores y que «xugó mui bien». «Diba perdiendo 3-6 y en nengún momento vi que podía remontar Pero sí que ye verdá que cometió un par de fallos y eso foi lo que me dexó acabar remontando 7-6”, espresa’l xixonés, que consiguío asina billete. Un llogru mui meritoriu l’algamáu pol xugador más mozu de tola competición, que compartirá desplazamientu «con otros diez asturianos colos que toi encantáu». La recompensa ye per 5 díes, pero van aprovechar pa gastar otros 5 díes y conocer bien Las Vegas y Nevada.
Entrugáu poles espeutatives nel Mundial, García Suárez nun dulda na respuesta: «Disfrutar. Quiero disfrutar del viaxe. Ye verdá que ye un Mundial y vas a dalo too, pero creo que’l billar nesti casu ye lo menos importante y nun puedes amargate’l viaxe por perder, porque’l nivel va ser bastante altu». Apoyándolu van tar el so padre y los sos tíos, Roberto y Ruth, propietarios del Serendepity, que se desplacen tamién a Estaos Xuníos. Una ocasión única pa disfrutar del so deporte favoritu y d’ún de los destinos más visitaos del país norteamericanu, mui conocíu n’Europa pola so apaición en películes y series.
Xuegu, estudios y entrenamientos
La dedicación al billar supón munchu entrenamientu que, hasta la fecha, pudo combinar ensin problema colos estudios. «Creo que la ESO foi fácil. Tengo una media de 7 con dalgo y agora toi faciendo bachiller. Sé que va ser difícil, que voi tener qu’apretar, agora con munchos más viaxes, pero pue compaxinase». El tener a disposición el bar de los sos tíos failo too más cenciello, cola posibibilidá tamién de prauticar en mesa grande, lo que lu favorez a la hora de competir en mesa pequeña, onde se xuega principalmente bola ocho y bola nueve.
Estos entrenamiento intensifíquense cuando hai tornéu, momentu nel que «intentes preparar l’enfrentamientu, ver cómo pue ser. Intentes que nun t’afeute nada, que la cabeza vaya bien, qu’al final ye mui importante». Entrugáu sobre les cualidaes necesaries pa ser un bon xugador, esplica que «cuando entames a xugar al billar has ser consciente de que te queda mucho per delantre, que vas tener qu’echa-y munches horas, que vas tener que fallar muncho y que vas perder. Entós diría que muncha disciplina, necesítase muncha disciplina». Pa los mozos que quieran empezar, recomienda acudir a los llugares especializaos, como’l Serendipity, y anque “nun ye un deporte tan baratu como’l fútbol» al tener que pagar poles meses, apunta que pa comenzar «val cualquier tacu». Col tiempu habrá pa mercar otros de más calidá, con equipos que pueden llegar a costar «al rodiu de 2.000 euros».
Con Las Vegas nel horizonte, García Suárez compite agora nel Ranking d’Expósito, «tamién xuego por equipos en mesa pequeña con dos compañeros. Y llueu, en mesa grande entamo yá esti añu; aparte de disputar la Lliga del Serendipity tamién cuento con xugar Federación Asturiana n’Uviéu y les prebes de Sevilla, Alicante, Uviéu y Galicia de la Federación Española». «Nun me pongo espeutatives, sólo disfrutar. Conocer a xente del billar, facer amigos y xugar bien, sacar el mio xuegu», confiesa. Un añu pa disfrutar y, quién sabe, debutar n’Estaos Xuníos a lo grande.
