El ministru Ernest Urtasun anunció na Comisión de Cultura del Congresu que na convocatoria de 2026 yá se podrán presentar obres en llingua asturiana, «una demanda histórica qu’agora se ve, con xusticia, reconocida»
Na so comparecencia d’ayeri na Comisión de Cultura de Congresu, fecha a pidimientu propiu pa facer balance de la metá de llexislatura y avanzar na fueya de ruta de cara al añu próximu, el ministru Ernest Urtasun fixo referencia a la llingua asturiana pa, ente otros coses, facer una anuncia mui esperada nel ámbitu lliterariu asturianu: «Nel 2026 les obres escrites n’asturianu podrán presentase a los Premios Nacionales, reconociendo a escritores na llingua d’Asturies, una demanda histórica qu’agora se ve, con xusticia, reconocida».
En realidá, anque citara namás el casu asturianu, al ser el Gobiernu asturianu’l que más enfotu punxo nesta cuestión, van poder competir a los diferentes ‘Premios Naciones de Literatura’ toles obres escrites en llingües con reconocimientu nel so respeutivu estatutu d’autonomía, casu tamién del aragonés. En Castilla y Lleón, mientres, l’asturlleonés tien presencia xurídica baxo’l glotónimu de ‘leonés’. Previamente, estos dos idiomes incluyéronse en toles convocatorias rellacionaos cola creación y la traducción lliteraria, asina como nos proyeutos de fomentu de la llectura de la Direición Xeneral del Llibru, del Cómic y de la Llectura, y incrementóse la so presencia nos programes de les feries internacionales del llibru nes qu’España foi país convidáu.
Dende’l Gobiernu d’Asturies, la conseyera de Cultura, Política Llingüística y Deporte, Ana Vanessa Gutiérrez, señaló que «ye una noticia que recibimos con muncha alegría. Llevábamos munchu tiempu plantegando esta petición al Ministeriu de Cultura y celebramos que se materialice, polo que correspuende agradecer a Ernest Urtasun y al so equipu’l facer posible un avance mui importante nel reconocimientu del asturianu como llingua de creación literaria, y un impulsu pa nuestros autores y editoriales». «Corrixe una ausencia y discriminación respective a los artistes que s’espresen n’otros idiomes del Estáu, y incorpora al asturianu y a los nuestros creadores al máximu circuitu de reconocimientu lliterariu», añadió.
