Les entraes pa la cita con Dixebra, Herbamora, Alienda y Llevólu’l Sumiciu, a la que se xuntó tamién Xuacu Amieva y Emilio Fidalgo, escosáronse; l’eventu de la Xunta pola Defensa de la Llingua Asturiana (XDLA), qu’algamaba la so trentena segunda edición, nun se celebraba dende 2019
Nel entamu del conciertu, a les 20 hores, quedaben unes poques entraes na puerta, pero rápidamente colgóse’l cartel de ‘Entraes escosaes’ nel uvieín Kuivi Almacenes. El públicu respondió al XXII Conciertu pola Oficialidá nun formatu nuevu, en sala, lloñe de les carpes o escenarios instalaos en diferentes llugares públicos, les últimes nel Parque Inglés (Hermanos Castro), enantes del parón fechu en 2019 cola edición nel avilesín Teatru Palacio Valdés como presentación del discu-llibru ‘La banda sonora de la oficialidá’ que repasaba les diferentes ediciones d’esti yá ‘clásicu’ eventu entamáu pola Xunta pola Defensa de la Llingua Asturianas (XDLA) pa reivindicar el reconocimientu de los derechos de los falantes d’asturianu y gallego-asturiano n’igualdá de condiciones que los de castellanu.
Volvía, poro, depués de seis años y una pandemia pel mediu, y, como siempre, cola participación desinteresada de los diferentes músicos y, como novedá, coles creadores de conteníu n’asturianu Asturxules como presentadores. Los más madrugadores tuvieron la suerte d’atopar enriba l’escenariu a Xuacu Amieva y Emilio Fidalgo, sorpresa de la xornada, que daríen pasu al grupu folk Alienda. Herbamora, cola so propuesta nueva con electrónica, caleció l’ambiente enantes del platu fuerte de la nueche, Dixebra, habituales nesta cita dende la primer edición nel 1989 na Pista la Esposición n’Avilés. Peslló la nueche Llevólu’l Sumiciu coles sos mezcles que fusionen electrónica y tradición ampliaes pol bon soníu de la sala.
