L’Asociación Garabuxada y l’Acuariu convoquen una edición nueva d’esti certame, dirixíu a alumnos d’Infantil y Primaria, nel que se podrá participar hasta’l 31 d’avientu; afitáronse cinco categoríes, con tres premios por caúna
Ye grande, ye barbudu, tienru, viste de mariellu y convirtióse en toa una autoridá dende’l mar de los Sargazos hasta Asturies. Piensen, dames y caballeros… ¿Quién pue ser? Sí, eso ye… ¡L’Anguleru! A menos d’un mes pa que la Navidá nos traiga tola so maxa, el más icónicu de los referentes autóctonos de diches fiestes yá prepara la so travesía oceánica hacia la costa del Principáu. Y, pa dedica-y el recibimientu que merez tan noble personaxe, l’Asociación Garabuxada y el BIOPARC Acuario de Gijón convocaron una edición nueva del non menos tradicional Concursu de Dibuxu y Pintura de L’Anguleru y la Navidá Asturiana, dirixíu a alumnos d’Infantil y de Primaria. Y les previsiones son de lo más optimistes, ciertamente… Y ye que na edición del añu pasáu participaron más de 3.000 estudiantes. Cuasi nada.
Los escolinos podrán dibuxar a L’Anguleru o la so barca, L’Angulina, asina como a cualquiera de los sos collacios, como Lolina o’l Nataliegu, o temes de la Navidá asturiana. Pa ello pueden emplegar tanto ceres como acuareles o rotuladores, ente otres téuniques de pintura, creaciones qu’han entregase al propiu Acuariu en formatu A4, ensin nengún añadíu que sobresalga o pueda despegase, o al corréu electrónicu info@languleru.com siempre que l’escaneáu sía de bona calidá. Les cinco categoríes del premiu son primer ciclu d’Infantil (0 a 3 años), segundu (3 a 6), primeru y segundu de Primaria, terceru y cuartu, y quintu y sestu. El ganador en cáuna d’elles va llevar un diploma, un regalu de L’Anguleru, garulla y un pase añal familiar pa 4 persones al Acuariu, mientres que’l segundu y terceru van recibir diploma, garulla y un pase añal.
