L’eventu, que va tener llugar n’Uviéu esti sábadu, axunta creación cultural, mocedá, feminismu, llingua asturiana y diversidá cultural; nel mesmu va desendolcase la I Muestra d’Asturianada Electrónica
Uviéu va vivir una xornada dedidaca a la creación cultural moza fecha por muyeres con Artístiques, eventu que va tener llugar en Kuivi Almacenes esti sábadu. Unes cuarenta artistes de diferentes campos, dende’l musical a les artes escéniques o plástiques, van tener presencia nesti festival qu’axunta mocedá, feminismu, llingua asturiana y diversidá cultural, y que pretende fomentar la ellaboración d’obres inédites.
Les artes plástiques van ser les encargaes d’abrir, a les 19 hores, esta iniciativa de calter gratuitu. María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella, Dido Carrero y las estudiantes de la Escuela Superior d’Arte del Principáu d’Asturies (ESAPA), Raquel Mañana, y de la Escuela d’Arte d’Uviéu, Lucía Álvarez, va pintar sobre llienzu hasta les 21.30 obres rellacionaes cola filosofía del festival. Cuando finen, presentarán les diez obres en direuto al públicu, que va tener la oportunidá d’alquirir en propiedá.
A les 20 hores va ser el turnu de les artes plástiques cola estrena de cuatro obres creaes a costafecha p’Artístiques. Son ‘Cuando pase l’iviernu’, por alumnes de la Escuela Superarior d’Arte Dramáticu (ESAD); un monólogu de Carmen Capellá; la perfomance de Adriana Yáñez ‘Bañu nel cristal’; y el monólogu poético-escénicu ‘Cadasorbu, cadamosca, cadaherida que me xurgo: d’abducciones, sangre seco y viesca frondosa’. Trátense de cuatro pieces «que xiren al rodiu temes como la muyer, el maltratu o la identidá», apunten dende la organización.
La parte musical va abrise a les 21.30 cola I Muestra d’Asturianada Electrónica, na qu’Alicia Villanueva y Lucía Rojo, acompañaes por DJ Lidia Friera, van presentar seis pieces inédites coles que pretenden renovar esti xéneru. Pa ello contaron cola producción musical de Llevólu’l Sumiciu y de Fruela 757, asina como coles lletres de les escritoras Blanca Fernández, Marina Pangua y Ánxela Gómez d’Ávila con temes actuales. La gallega Catuxa Salom y la vasca Süne van pesllar el festival como convidaes coles sos propuestes qu’axunten música de raigañu, llingua propia y electrónica, xunto coles asturianes Rellume, un tríu de moces pandereteres.
Artístiques entámalo la marca Puru Remangu, que conmemora los sos siete años de vida y los dos de l’apertura de la so tienda física n’Uviéu, y la promotora Ixuxú Cultura. L’accesu ye de baldre gracies a la subvención a festivales de la Conseyería de Cultura, Política Llingüística y Deporte, a les Ayudes ‘Injuve’ a la Creación Moza que concede’l Ministerio de Mocedá y Infancia, y a un patrociniu de la Fundación Caja Rural de Asturias. Enar Areces, Xicu Ariza y Marina Bruno encárganse de la producción, organización y comunicación; Marta Taboada, de la identidá gráfica y diseños; Sandra Sienra, de la escoyeta musical y comercialización; Nay Semeya, de les fotograíes y realización audiovisual; y Aida Holgado, de la semeya de productu.
