L’equipu femenín de la zona oeste, que cuenta con una Copa de la Reina nel so palmarés y llevó’l nome de Xixón per Europa, vive una etapa nueva centrada nel trabayu cola base; la so máxima ye «intentar que tol mundu tenga güecu» nuna entidá con senior agora en territorial
El descensu de División d’Honor y l’arrenunciu a la plaza n’Oru, anunciáu en xunu, supunxo un pasu atrás pal Club Balonmano La Calzada, pero non un desvíu nel camín. La decisión pretendía salvaguardar la estructura de la base y convierte agora a la cantera na apuesta principal de la entidá, que salió finalmente a competir con un senior a nivel territorial. Una vuelta al puntu d’entamu d’una historia que nació nel 1996 de la xunión de dos clubes de la zona oeste, el Club Balonmano Riscar y la Asociación Deportiva Balonmano La Calzada, «pa xuntar tol balonmanu del oeste de Xixón», apunta la so presidenta Alejandra Argüelles, y que de la mano de Miguel Álvarez Baños, dirixente máximu per 22 años, hasta la so muerte nel 2018, tocó la cima.
«L’equipu foi creciendo, pasando per diferentes etapes a lo llargo de les categoríes qu’hebo, yá que les lligues van cambiando, hasta pasar 9 años na élite», esplica Argüelles. Foi nel 2014 cuando’l CB La Calzada «empieza a plantegase de forma más seria el pensar en xubir», momentu nel que «entra en xuegu Mavi Nuevas Tecnologías como patrocinador, que da esi emburrión económicu que fai falta siempre pa poder consiguir les coses. Fiximos un equipín bastante guapu, tuvimos tres años ehí peleando por xubir y al final, na 15-16, consiguímoslo», recuerda. Na segunda temporada en División d’Honor, nel 2017, llegaría la Copa de la Reina y delles clasificaciones europees que se concretaríen na 2022-2023 cola participación na EHF European Cup, competición na qu’algamó los cuartos de final depués de superar al Ali-Best Espresso Mestrino italianu, al WAT Atzgersdorf austriacu y al checu Házená Kynžvart, col Elche como verdugu.
«A partir del descensu podíemos quedar n’Oru, pero lo cosa venía yá mui apretaduca d’años atrás porque les lligues cada vez se profesionalicen más, necesítense más coses, hai más necesidaes económiques, y nós llevábamos arrastrando ehí una penuria. Agora cambiamos un poco’l rumbu y centrámonos más nos equipos de base, que siempre tuvimos; nes neñes que yá tenemos y en fomentar tolo que vien perbaxo, qu’al final si non ye bastante difícil, nesta comunidá autónoma, xestionar temes profesionales, imposible», esplica la presidenta. Asina, el primer equipu compite agora nel Campeonatu Territorial Senior/Xuvenil, la categoría autonómica, y La Calzada caltién dos cadetes y un infantil, amás de 9 escueles deportives y un equipu inclusivu. En total, ente 80 y 100 xugadores que compiten y entrenen nel Pabellón de L’Arena y nel de Moreda a les órdenes d’una decena de téunicos.
Apunta Argüelles que la filosofía del club ye’l de la «inclusividá, en tolos sentíos. El nun pesllar la puerta a naide, el da-y la oportunidá a cualesquier persona, yá sía neñu o neña, tenga discapacidá o non, pa que puedan facer deporte. Que tol mundu tenga güecu, se sienta parte del club». Y ye que, magar sía un club femenín, tanto les escueles como l’inclusivu son mestos. A partir d’esta máxima, la intención ye «crecer, fortalecer esos cimientos de los neños y les neñes que tán con nosotres, y poder dalgún día volver a llegar a categoría nacional gracies sobre manera a trabayar dende abaxo». Será pronto.
