«La esperiencia dizte que’l primer equipu tien que ser una consecuencia del trabayu de la base», apunta Juan de Álvaro, presidente del club que, per dos años, tocó la gloria de l’ASOBAL; agora céntrase na formación de xugadores, con 250 efeutivos nos sos diferentes equipos
Foi nel 2009 cuando echó a andar l’Agrupación Balonmano Gijón Jovellanos, nun momentu nel que «había la sensación de que yéremos munchos en Xixón tirando caún pal so llau y que teníemos que buscar la xunión de toos p’atopar un equipu representativu qu’axuntara a los xugadores que diben saliendo nos años últimos», recuerda’l so primer y hasta la fecha únicu presidente, Juan de Álvaro, naquel tiempu nel Inmaculada. «Aconceyamos col Revillagigedo, col Grupo Astur, col Codema…, y decidimos tirar p’alantre col tema», añade, quedando fuera del proyeutu’l Grupo Covadonga al decidir esta sociedá «siguir el so camín». Una plaza llibre en Primera Nacional permitió al club el salir nesta categoría, entamando un carrera meteórica que desembocaría na máxima categoría.
«La idea yera xuntar a los xugadores qu’andaben en diferentes equipos de Segunda en Xixón. Coincidió una xeneración bona de xente que taba fuera y que poco a poco pudimos dir repatriando, y coincidió qu’Alberto Suárez, que volviera a Asturies, taba al frente del proyeutu. Con una cosa y otra, y con un muncho d’inconsciencia, fuimos creciendo». Un ascensu nel segundu añu a Plata; una fase pa xubir a ASOBAL «en Cangas de Morrazo, que perdimos la semifinal», nel terceru; y el saltu definitivu de categoría, nel cuartu, «directos nuna temporada mui bona», foi la trayeutoria del Gijón Jovellanos nesti tiempu.
La primera campaña n’ASOBAL, la 2013-2014, «salió bastante bien y consiguimos caltener bien la categoría». La segunda, cuando l’entós Juanfersa Gijón, por cuestiones de patrociniu, clasificó pa la final a 4 de la Copa que se disputó nel Palaciu, raspiando la final depués d’un gran partíu col Granollers, «costónos muncho porque la plantía que fiximo poco a poco yera nesi momentu más cara mantenela; la xente revalorizárase. Nun llegábamos a mantener xugadores y los fichaxes nun salieron como debíen; apostamos por xugadores mozos y bonos, pero entamó mal la temporada y nun salimos del pozu». Dos campañes depués, el club volvía a Primera Nacional, onde continúa. «Col pasu los años cambió la filosofía del club. Evolucionó muncho, con una cantera con 250 xugadores propios: escueles deportives municipales en tres colexos de Xixón y cuatro equipos infantiles, tres cadetes y dos xuveniles. Y entamen a salir chavales de la cantera propia al primer equipu poco a poco», destaca De Álvaro.
El presidente afirma que «al final la esperiencia dizte que’l primer equipu tien que ser una consecuencia del trabayu de la cantera. Y lo mesmo que nel so día aprovechámonos del trabayu d’otros, de toa Asturies, porque’l club nun tenía cantera, agora tamos faciendo munchísimos xugadores que pronto tendremos en munchos equipos de categoría nacional, no sólo del nuestru». Asina, l’oxetivu principal anguaño ye que «los chavales vaya entrando en seleiciones nacionales, en centros d’altu rendimientu, y que vayan poco a poco saliendo p’alantre como xugadores».
«Agora, colo que sabemos, nun llegaríamos a ASOBAL tan rápido, de xuru. Y nun sé siquier si llegaríemos, porque al final se xeneró una deuda mui grande sobre’l llombu de xente que nun se dedica a ello. El procesu foi duru, pero güei tamos nuna situación cómoda, tranquila, na que vamos poco poco, que si me lo dicen va 6 años nun me lo creo. Entovía nun llimpiamos la deuda dafechu, pero va quitándose sele y van faciéndose coses», sincérase al tiempu en qu’insiste en que la filosofía nueva del club ye «formar xugadores y crecer con ellos hasta onde podamos». «Una categoría como la Plata a mediu plazo debería ser l’oxetivu pa que los xugadores nun tengan una salida tan rápida y puedan dir creciendo, y llueu pensar en cotes mayores», añade. Pa ello contará col sofitu del bon trabayu de cantera desenvueltu polos 25 téunicos del club nel Palaciu y Moreda, una masa social que cuenta con cerca de 400 abonaos y «patrocinadores mui estables que nos ayuden muncho», agora con Royal Premium como sponsor principal.
