Esta práutica deportiva con orixe n’Estaos Xuníos tien afición n’Asturies, como amuesen los 300 socios y los más de 100 prauticantes colos que cuenta na so estructura esti club con plaza en Lliga Nacional, la máxima categoría, qu’esta temporada tresllada los sos partíos al estadiu d’atletismu de Les Mestes
Nun son pocos los aficionaos al fútbol americanu en Xixón y n’Asturies, que cuenten dende 2002 con un referente nel Gijón Mariners, una entidá que dio los sos primeros pasos n’El Natahoyo un añu enantes. «El club fundáronlu Daniel Castañón, entrenador de cantera del equipu, y Toni Bergés, qu’entamaron xugando flag, la modalidá de fútbol americanu ensin contautu, na playa», rememora Nacho Valdés, ‘head coach’ o entrenador principal del senior de los Mariners. «A partir d’ehí foi creciendo. De dos pasaron a ser cinco pa xugar una protolliga de flag qu’había naquel momentu n’España y agora’l club cuenta con un equipu na máxima categoría nacional; dos de flag senior, masculín y femenín; y les categoríes de formación, junior y cadetes, y un sub-15». En total más de 100 xugadores de los dos sexos prauticando esti deporte.
Toos ellos beben de la filosofía de los Mariners que, asina mesmo, failo de los valores del fútbol americano, que Valdés resume en «disciplina, trabayu n’equipu, compañerismu y sentíu de pertenencia, porque al final somos l’únicu club de la nuesa división que compite contra ciudaes grandes». El «60 o 70 %» de la plantía del primer equipu procede de la base, resultáu d’un trabayu d’años col oxetivu de captar y formar a xugadores dende pequeños. «Agora yá, por suerte, tenemos dellos chavales que tienen 18 o 19 años qu’entamaron a xugar en categoríes inferiores», apunta l’entrenador principal, qu’esplica que lo habitual hasta’l momentu yera que «empezaren con 20 años». «Deprender a dalguien a facer un deporte completamente nuevu ye mui complexu. Lo ideal ye que lleguen al primer equipu teniendo la base que tendría cualquier otru deportista cuando llega al primer equipo de cualquier otru club», argumenta.
Nestos momentos en pretemporada, yá que la lliga regular, d’ocho enfrentamientos, arranca’l 17 de xineru, los Mariners preparen la mudanza al estadiu d’atletismu de Les Mestes, unos metros más allá del so llugar habitual de xuegu, l’hipódromu, por cuestión d’unes reformes. Hasta ellí desplazaránse los 300 abonaos y los cerca de 200 aficionaos más qu’acuden a los partíos d’una entidá qu’intentará «facer play-off, que sería quedar ente los dos primeros del nuesu grupu. Ési ye l’oxetivu soñáu, pero’l real, como cada añu, ye mantener la categoría».
Mentes, el restu d’equipos xugarán na Llaboral esti añu. Ellos prautiquen la modalidá ensin contautu, el flag football, yá que’l tackle football, la más conocida, magar que podríen competila dende los 16 años, nun cuenta con lliga sub-17. Sicasí, ye una bona manera pa que los chavales se formen y cuando «lleguen al primer equipu tengan la base que nos interesa. Y que d’esa manera cuenten con oportunidaes, que puedan xugar a fútbol americanu cola so ciudá o seleición nacional, o consiguir una beca». Y un apunte, el flag football va ser olímpicu en Los Angeles 2028, lo que s’espera que sirva pa qu’esti deporte gane visibilidá a nivel mundial.
