Con muncha vitalidá nel pasáu, nos años últimos estos elementos tán recuperándose gracies al trabayu d’investigadores, vecinos y maestros que tán puxando por que nun se pierdan; «nun venimos a quitar nada, sinón a complementar, que nun escaezamos lo de nueso», diz Víctor Raúl Pintado ‘Vitu’
Como con otres tantes festividaes, el poder de la televisión y el cine, amplificáu agora poles redes sociales, ta faciendo que dellos elementos va años inesistentes en cases asturianes en Navidá sían anguaño habituales. El personaxe navidiegu Papá Noel, los calcetos o, nestos años últimos, los elfos, formen parte yá del nuesu Nadal, pero Asturies cuenta tamién con elementos tradicionales que gracies al trabayu d’investigadores, vecinos y maestros tán revitalizándose. «Nun venimos a quitar nada, venimos un poco a complementar. Esto ye, tolo que ta, si la xente lo quier disfrutar, fenomenal, pero nun nos escaezamos de lo de nueso, que ta ehí tamién y tien otru espaciu», esplica Víctor Raúl Pintado ‘Vitu’, profesor d’Infantil del avilesín CP Poeta Juan Ochoa, ún de les persones que vien estos años últimos puxando pola so recuperación y que ta acabante de fundar, con otres profesores y xente interesao nesta temática, una asociación cultural de nome Compaña L’Asoleyada «pa empezar a trabayar toos estos temes».
Los elementos más visibles de la Navidá asturiana tradicional son les mazcaraes d’iviernu, el ramu Nadal y el nataliegu. Los aguilandos, como tamién se llamen a les primeres, facíense nestes feches, col solsticiu d’iviernu, cuando grupos de mozos diben peles cases de los pueblos pidiendo regalos, que solíen ser comida, dulces y oruxu. Éstos van amazcaritaos, d’ehí’l nome de mazcaraes d’iviernu, y, según el sitiu, salen en dalgún día de los señalaos de los festexos, como Nuechebona, Nuechevieya o Reis, nos que los vecinos esperaben la so llegada porque yeren símbolu de bona suerte. N’Asturies entovía caltiénense dalgunes comparses gracies a esfuercios de vecinos y delllos coleutivos, como los Aguilandeiros de San Xuan de Villapañada (Grau), que van salir mañana (a les 10 hores del albergue pa caleyar Rozadas, Acebéu, La Llinar y San Xuan y finar nel campu la Ilesia con una xinta popular y folixa); el Guirria de San Xuan (Ponga), que lo fai’l 1 de xineru; Os Reises del Valledor (Ayande), el 3 esti 2026; o Los Sidros y Les Comedies de Valdesoto (Siero), el 11, ente otres.
«N’Avilés nun tenemos recoyido, nun hai informantes, d’una mazcarada, anque too pinta, polos documentos que vamos lleendo, que les había», señala Vitu, qu’a lo primero de mes trabayó esti elementu nuna actividá xunto col ramu Nadal y el nataliegu en comuña col CP Villalegre, lo que llamó ‘Triángulu de la Navidad ancestral asturiana’. Tamién, xunto cola Estaya de la Llingua d’Avilés, celebró’l vienres na Casa Cultura la IX Folixa de la Navidá, a la que se conviden a tolos colexos públicos de la ciudá y nel que «facemos un espectáculu n’asturianu nel que los protagonistes son los neños, porque vienen a cantar pieces o recitar poemes». El ramu Nadal y el nataliegu tuvieron ehí presentes xunto con personaxes de la escuridá del Antroxu tradicional avilesín, que’l Coleutivu Abillés Antroxu Tradicional ta recuperando, como El Cornelu, como representación d’una mazcarada, o personaxes navidiegos modernos, como L’Anguleru.
«L’árbol navidiegu autóctonu»
Y ye que la ciudá del ‘Adelantado’ ta puxando fuertemente pola recuperación d’estos elementos. Asina, na Casa Conceyu tán instalaos un ramu Nadal y un nataliegu como parte de la decoración, y el martes 23 va entamar el ‘Cortexu del nataliegu’. Ésti va tener salida a les 18.30 hores de la plaza d’El Carbayo, «que ye’l barriu de pescadores de tola vida», con presencia de mazcaritos, la Banda de Gaites La Laguna del Torollu, un nataliegu, los neños y neñes de Xaréu d’Ochobre vistíos d’asturianu, esplumeros y trasgos que faen trastaes al públicu, y, por último, L’Anguleru y el so barcu, L’Angulina, ente otres novedaes marineres, con un final con espectáculu n’El Parche.
«El ramu Nadal nosotros definímoslu como l’árbol navidiegu autóctonu, que sería una cadarma de madera, normalmente de castañu. N’Avilés tomamos el de dos triángulos pola referencia que nos dio Alberto Álvarez Peña», investigador espertu en tradición. «Lo típico yera poner 12 veles, anque con esti asuntu hai debate. Hai dalgunos que dicen que ye polos 12 meses del añu, otros polos 12 apóstoles, pero nós facemos el más ancestral que comenta Álvarez Peña, ensin elles, enramando la cadarma. Como nun tenemos texu y l’acebu nun se pue garrar güei día, facémoslo con lloréu o otres fueyes perennes», esplica Vitu. El procesu termina con «llazos, flores de papel, mazanes, naranxes, rosquielles… Y como Álvarez Peña fala d’unos bollinos de Nadal, nós ponemos como referencia les marañueles d’Avilés». Una decoración o forma qu’en cada llugar tien les sos particularidaes; asina, por exemplu, en Lleón, onde tamién ye tradicional, esti elementu suel ser d’un triángulu.
Sobre’l nataliegu, apunta que «ye’l tueru de Navidá asturianu». De «carbayu, porque ye una madera mui compacta y da munchu calor, echábase al fueu la nueche de Navidá y les sos cenices, en Navidá, espardíense na cuadra pa que los animales nun tuvieren enfermedaes o nes güertes, pa tener una bona collecha», anque había cases nes que se guardaben hasta’l Nadal siguiente o lo sos restos como base del fueu del añu nuevu. «Como agora yá nun hai llares nes viviendes pa quemalos, convertímoslu nun elementu más decorativu. Y pa facer más atractiva pa los neños esta tradición, que tien presencia n’otros puntos de Europa, como Italia y Francia, o d’España, en Cataluña col Tió de Nadal o n’Aragón cola Tronca de Nadal, ponemos-y güeyinos, una ñariz y cuatro patines».
L’Anguleru
A estos tres elementos de la Navidá tradicional asturiana incorporóse nel 2008 L’Anguleru, un personaxe navidiegu creáu pola Asociación Cultural Garabuxada, de la población de L’Arena, «de gran tradición angulera». «Cuando llegaba l’anguleru col caxón enllenu d’angules, sabíen que diben tener una bona Navidad, una bona mesa en Nuechebona. Yera como’l Papá Noel asturianu y ehí naz la so figura», apunta Vitu, autor de ‘La hestoria de L’Anguleru’ xunto con Paloma González y Carmen Alons, albúm ilustráu por Christian Bartsch destináu a neños d’Infantil, y ‘L’Anguleru. Suaños de Navidá’, pa neños y neños de Primaria, espublizaos naquellos primeros años.
El cuentu apunta que L’Anguleru vive nel mar de los Sargazos cuidando de les angules y les anguiles nes selmanes previes a Navidá —esti añu aportó’l día 5— pa pescar nel Nalón en Nuechebona, vendela, y coles perres que saque, mercar regalos a tolos neños y neñes asturianos, qu’entrega esa mesma nueche. Pa ello, han dexar un gorru de llana en Nuechebona baxo l’árbol y dalgo de comer y beber pa que pueda reponer fuercies. «Puxando toos nel mesmu camín, n’Avilés incorporamos a Lolina la Rulera, un personaxe real de la historia pesquera d’Avilés, fía de Xesús el Ruleru, de los primeros ruleros d’Avilés. Ella sería la compañera de L’Anguleru en tierra, trabayando con los llendadores de ríu, que s’encarguen de cuidar los ríos y caltenelos llimpios», unviando asina tamién un mensaxe de respetu al mediu ambiente.
Col pasu los años, esti personaxe foi ganando espaciu y, poco a poco, entrando en munches cases asturianes, incorporándose a estos elementos de la Navidá más tradicional na comunidá, en procesu de revitalización, que se completaría col Día de Reis, el 6 de xineru, celebración entovía con munchu puxu.
