Dos conciertos y un cuentacuentos ‘sonoru’ conformen la programación de la décima edición del festival que programa en Xixón toles navidaes actividaes en llingua asturiana pa los más mozos de baldre de la mano de ‘Reciella. Families pol Asturianu’, esti añu dedicáu a la música
Dende’l 2013 ye difícil entender la Navidá xixonesa ensin Escenines pa la Reciella. Esi añu foi’l primeru en que l’asociación ‘Reciella. Families pol Asturianu’ entamó esti festival, col sofitu de la Fundación Municipal de Cultura, Educación y Universidá Popular, pa que neños y neñes pudieren tener actividaes en llingua asturiana nesti periodu vacacional tan especial, con enllenos continuos nes diferentes funciones. Esta tarde va principiar una edición nueva del certame, la décima, que ta dedicada «a un elementu fundamental pa la tresmisión, el aprendizaxe y el disfrute de los idiomes: la música». Van ser tres actividaes a lo llargo de la fin de selmana nel patiu del Centru de Cultura Antiguu Institutu, toes con entrada llibre hasta completar aforu.
Los ‘Cantares de y pa neños y neñes’ de Fernando Valle Roso y Silvia Moreno van protagonizar a les 19 hores l’actuación inaugural, un proyeutu musical nacíu nel 2021 nel que los dos cantantes averen a la reciella aquellos temes emplegaos en xuegos y actividaes cotidianes por xeneraciones d’asturianos col enfotu de que nun se pierdan. Escenines pa la Reciella va siguir mañana al meudia col conciertu de presentación del discu-llibru ‘Pop Piquiñín. Una escoyeta de les canciones n’asturianu de Petit Pop’ (La Fabriquina), ilustráu por Pedro Balmaseda, coles pieces más populares de la banda y los sos cenciellos últimos, traducíos per primer vegada a la llingua asturiana. Depués de l’actuación, la banda va firmar exemplares al públicu interesáu.
A la mesma hora del domingu va tener llugar la tercer y cabera actividá del festival. Va ser el cuentacuentos ‘Hestories sonores’, del Dúu Amati. Trátase d’una iniciativa de Ana Fernández (violín) y Ignacio Alonso (violonchelu) xunto col escritor Aique Fernandi con rellatos como ‘Un trasgu na ciudá’ o ‘Lo que me cuntó’l llobu’.
