Herederu de la seición de rugbi del Sporting, esti club xixonés creó dende la nada una estructura de cantera que cuenta anguaño con más de 200 llicencies compitiendo nos sos equipos masculinos y femeninos
La historia del Gijón Rugby Club Universidad de Oviedo naz na década de los 80, anque la so entrada n’activu nun llegaría hasta 1995, cuando desapaez la seición de rugbi del Sporting cola so tresformación poco enantes en sociedá anónima depotiva. «Tolos xugadores, y la masa social, pasen al Gijón Rugby pa siguir prauticando rugbi», rememora’l presidente actual de la entidá, Eduardo Palacio, nun trespasu de poderes firmáu en documentu oficial «pol xugador del Sporting César García, que se convirtió en presidente nesi 1995». Finaba asina la trayeutoria d’un equipu que compitió col nome de Real Gijón nos sos primeros años dende la so creación a partir del equipu de fútbol de la ciudá nel 1966, y que na temporada 77-78 xugó na máxima categoría estatal, yá col nome de Sporting.
Naquel momentu, el club «arrancaba ensin cantera. Nun había categoríes inferiores porque había mui poco», lo qu’entamó a camudar col cambiu de sieglu. Ye nesi momentu cuando’l Gijón Rugby entama a crear una estructura de base, «creciendo poco a poco hasta tener equipos en toles categoríes», celebra Palacio. «Depués d’un procesu llargu, fuimos evolucionando y la temporada pasada algamamos les 207 llicencies en total», apunta darréu, «mozos y moces». Y na parte cimera, los dos senior, el masculín, que llegó a militar na segunda categoría, la entós nomada División d’Honor B, agora dos niveles perbaxo depués de la reestructuración d’esti añu, na Lliga Asturcántabra, mentes que’l femenín tamién compite nun categoría interautonómica.
«La nuesa intención ye dar les máximes facilidaes, les meyores condiciones, pa que la xente prautique deporte y que sía rugbi. La nuesa filosofía ye facer», destaca Palacio, que remarca’l calter amateur del Gijón Rugby ensin refugar «llegar a lo máximo posible». «Como club el nuesu oxetivu ye consolidar tolo que tenemos. Ye mui difícil facer, pero ye mui fácil destruyir. D’un añu pa otru pue perdese tolo avanzao. Asina, lo más importante nestos momentos ye consolidar tola masa social, toles seiciones, tol grupu humanu qu’hai agora mesmo», esplica’l presidente.
La Llaboral, poles obres del verde de Les Mestes, acueye esta temporada tolos partíos del club, amás de los entrenamientos d’una entidá con una consolidada masa social y tres equipos fuera del deporte federáu. Trátase del inclusivu, la seición «que llamamos maters, muyeres de más de 35 años que nunca prauticaron rugbi, que pueden ser madres de xugadores o non», y el de ‘rugby touch’, «una modalida que ye mesta», ensin contautu, «pensada pa xente que dexara de xugar rugbi 15 y padres que tampoco nunca fixeran rugbi».
Y ye qu’esti deporte engancha, polo que tien muncha afición. D’ehí que’l ‘Pallabreru del rugbi’, editáu pola Oficina de Normalización Llingüística de Xixón, sía ún de los vocabularios temáticos n’asturianu más difundíos de los asoleyaos dende l’Ayuntamientu de diferentes deportes. El so autor ye José Ramón Matilla, persona mui venceyada al Gijón Rugby y que trabaya nun llibru que cuenta la historia de la entidá dende aquellos primeros años del Sporting.
