La yá exministra Pilar Alegría refugó otra vuelta la modificación de los reales decretos que permitiría a estos maestros tener los mesmos derechos llaborales que los sos compañeros de centru; consideren que’l Gobiernu asturianu «nun ta tomando en serio» la so situación y nun arrenuncien l’entamu d’una fuelga
El 26 de payares, Eva Ledo acudió al Ministeriu d’Educación, Formación Profesional y Deportes p’aconceyar cola so entós titular, Pilar Alegría, sustituyida la selmana pasada por Milagros Tolón al acudir l’aragonesa como candidata del PSOE a les eleiciones de la so comunidá autónoma. Nella la conseyera d’Educación treslladó, según informaron nel so momentu dende Prensa del Executivu, «les prioridaes de xestión del Principáu, ente elles l’aplicación del pautu ‘Asturias Educa’, les polítiques de bienestar emocional y prevención del acosu y del suicidio o la puesta en marcha de la nueva llei de Formación Profesional (FP) dientro del so ámbitu d’actuación». Ente los temes de ‘Asturias Educa’, «especificó-y el puntu nel que se reivindica la creación de la especialidá docente d’asturianu, pa poder dar respuesta a los más de 330 profesionales que nestos momentos exercen nes aules del Principáu y que nun pueden nin estabilizar nin presentase a oposiciones», señalaba una nota de prensa.
En concreto, la conseyera declaraba a la salida qu’entregara a Alegría una copia del pautu y «que mostrara interés». «Dientro d’él, una de les principales polítiques nes que tamos trabayando ye la necesidá de contar cola especialidá de Llingua Asturiana y Gallego-asturiano pa tener el marxe xurídicu necesariu que nos permita dar cumplimientu a la distinta normativa d’aplicación», espresaba. Sicasí, nun conceyu colos sindicatos pal siguimientu de ‘Asturies Educa’, celebráu trés selmanes después, informábase dende l’Executivu d’una negativa nueva de Madrid pa la modificación de los reales decretos énte la falta d’oficialidá de los dos idiomes.
L’Asociación de Docentes d’Asturianu y Eonoaviego/Gallego-asturiano (ADAE), llueu de tener conocimientu de la situación al traviés de Comisiones Obreres (CC OO), aspeutu confimáu darréu pol Sindicatu Unitariu Autónomu de Trabayadores de la Enseñanza d’Asturies (SUATEA), decidió dar un pasu más a les sos reivindicaciones y presentar una quexa formal énte’l Defensor del Pueblu «solicitando la so mediación pa poner fin a una discriminación que s’allarga dende va décades y pa que s’adopten midíes qu’aseguren el cumplimientu de la llegalidá vixente». Asina, una delegación d’esti coleutivu desplazóse ayeri a Madrid pa entregar tola documentación en persona.
Denuncien que la decisión d’Alegría «condena a 332 docentes n’Asturies a una situación d’interinidá perpetua, en clara contradicción cola normativa europea que prohíbe l’abusu de la temporalidá nel emplegu públicu». «La normativa educativa de mayor rangu, la LOMLOE, permite de forma clara l’enseñu d’estes llingües inclusive ensin estatus de cooficialidá. Por ello, correspuende al Gobiernu estatal garantizar que’l profesoráu que les imparte tenga los mesmos derechos llaborales que’l restu d’especialidaes docentes, con independencia del reconocimientu xurídico de les llingües oxetu d’enseñu», argumenten.
Por último, llamenten «la falta de comunicación per parte del Gobiernu del Principáu d’Asturies y la Conseyería d’Educación, yá que la respuesta del ministeriu nun se conoció hasta tres selmanes depués del alcuentru cola ministra, ensin que se treslladara hasta entós información oficial nin al profesoráu afeutáu nin a les organizaciones sindicales». Nesi sen, ADAE «solicitó en numberoses ocasiones una xunta cola conseyera col oxetivu de trabayar de forma conxunta colos sindicatos en busca de soluciones, ensin qu’hasta’l momento fuera posible dichu alcuentru». Considera esti coleutivu que l’Executivu «nun ta tomando en serio esti conflictu llaboral enquistáu depués de más de 40 años de presencia de les llingües propies d’Asturies nel sistema educativu» y anuncia pa xineru una «xunta abierta a tol profesoráru d’entrambes especialidaes pa consensuar les movilizaciones siguientes, ensin descartar inclusive la convocatoria d’una fuelga si nun se producen avances reales».
