El xixonés taba en Tenerife pasando unos díes cuando col fin d’añu la muerte-y llegó de sópitu; miembru activu de Conceyu Bable, militara de mozu nel Partido Socialista Popular (PSP) y, darréu, nel PSOE, enantes de crear el Partíu Asturianista (PAS) nel 1985, y tien escrito llibros sobre tradición oral
El 2025, un añu d’importantes perdes pal asturianismu, acabó con una triste noticia que viaxó de Canarias a Asturies n’Añu Nuevu. Finaba a los 67 años de sópitu mientres pasaba en Tenerife unos díes de descansu Xesús Cañedo ‘Chus’, xixonés del barriu de Trubia en L’Abadía Cenero que viniera a esti mundu nel 1958. Llicenciáu en Derechu pola Universidá d’Uviéu, desendolcara la so actividá profesional nuna entidá bancaria primero y como abogáu del Estáu depués de superar unes oposiciones.
Miembru activu de Conceyu Bable, Cañedo punxo enfotu na política. Entamó la so militancia nel Partido Socialista Popular (PSP), que s’integraría nel PSOE, mesmu camín que siguiría Xuan Xosé Sánchez Vicente, col que compartiría amistá y trayeutoria. Los dos abandonaron la FSA nel 1983 y dos años después, xunto con Carlos Rubiera, fundaron el Partíu Asturianista (PAS), únicu proyeutu d’esta corriente política qu’algamaría representación na Xunta Xeneral.
Dende la figura de secretariu xeneral, que caltenía anguaño, convirtióse en persona vital pa que la llingua asturiana contara con regulación. Como parte de la negociación presupuestaria ente’l PP y el PAS de les cuentes de 1998, nun Parllamentu nel que Sergio Marqués gobernaba con 21 escaños en minoría énte una FSA con 17 y una Izquierda Unida (IU) con 6, que más tarde seríen 5 tres la salida d’Antón Saavedra, la formación asturianista llograría sacar alantre la Llei d’Usu y Promoción del Bable/Asturianu, entá vixente, negociada y redautada direutamente nel despachu del presidente por él y pol diputáu Sánchez Vicente depués d’un primer documentu presentáu pola Conseyería de Cultura dirixida por María Victoria Rodríguez Escudero que consideraron indignante. El testu final, aprobáu en marzu del 1998, incorporaría enmiendes d’un PSOE naquel tiempu contrariu a la oficialidá del idioma y d’IU, partíos que s’oponíen a la fórmula negociada col PP.
No cultural, participó na Fundación Nueva Asturies y trabayó la divulgación de la tradición oral con títulos como ‘Los dioses derrotaos’, ‘Refranero asturiano’ o ‘Mundu, saber y decir nel refraneru’, fechos en comuña con Xuan Xosé Sánchez Vicente. Les reaiciones depués de la so perda foron múltiples en redes sociales, destacando d’él sobre manera, amás de la so contribución a la dignificación del idioma, el so bon tratu. «Alma del PAS, amigu de toos, escelente persona», apuntaba Sánchez Vicente, persona que s’encargó de dar a conocer la noticia de la so perda.
Dende Iniciativa pol Asturianu, coleutivu al que s’asoció nos sos primeros tiempos, «valorando siempres el trabayu de la organización y l’espíritu tresversal y de consensu de la mesma», emitieron un comunicáu tresmitiendo’l pésame a la familia y destacando el so llabor y llogros, refiriéndose a Cañedo como «una persona comprometida cola cultura y la llingua asturianes».
