El xueves abre la inscripción pal certame sierense, de nueve xornaes, que se va desendolcar a partir del día 1 en Llugones; l’Auditoriu de La Pola va se la sede de les semifinales y finales, asina como de la gala d’entrega de premios
Llugones y La Pola Siero repártense nueve xornaes de canción asturiana nes que poder disfrutar en direuto de dalgunes de les meyores voces d’esti xéneru. Apuerta la decimocuarta edición del Conceyu de Siero, puntuable pal Premiu Obdulia Álvarez ‘La Busdonga’ d’Asturianada, que presentó Aurora Cienfuegos, conceyala de Cultura, Recursos Humanos y Policía Llocal, esta mañana. «Ye una cita yá consolidada dientro’l calendariu cultural del conceyu y una referencia n’Asturies pa la difusión y el cuidáu de la canción asturiana», apuntó la edil sobre esta iniciativa de la Fundación Municipal de Cultura.
La edición del 2026 del concursu vien con delles novedaes, como la interpretación, na fase final, d’ún de los tres cantares ensin megafonía, asina como la posibilidá d’inscribise de forma independiente nes estayes de canción vaqueira, ayerana y dialogada, ensin necesidá de competir nel concursu principal. El plazu pa participar abre esti xueves y va pesllase’l día 30, col entamu del certame previstu pal domingu 1 de febreru a les 11.30 hores nel Auditoriu del CPI de Llugones.
Esta población va acoyer tola fase previa (también 8, 15 y 22 de febreru), mentes que les semifinales (1, 8 y 15 de marzu) y les finales (12 y 19 d’abril) van pasar al Auditoriu de La Pola, que tamién va acoyer la gala d’entrega de premios, prevista pal 10 de mayu. Isaac Sierra y Lorena Corripio foron los ganadores de la edición pasada, mentes que Cristina Sánchez y Manuel Roza fixéronlo na modalidá dialogada; Carlos Velasco, na de canción ayerana; y María Luisa Martínez Suárez, na de vaqueira.
