L’Asociación de Docentes d’Asturianu y Eonaviego/Gallego-asturiano (ADAE) aconceyó esti miércoles cola conseyera d’Educación pa tratar esti asuntu, bloquiáu en Madrid col argumentu de la falta d’oficialidá; los maestros caltienen les movilizaciones
El Gobierno asturianu pretende treslladar a Milagros Tolón la histórica demanda de los maestros y maestres de Llingua Asturiana y Eonaviego/Gallego-asturiano de la creación de la especialidá docente. Ye la tercer ministra socialista d’Educación dende la moción de censura a Mariano Rajoy nel 2018 depués d’Isabel Celáa y Pilar Alegría, polítiques que negaron la mesma col mesmu argumentu: los dos idiomes nun son oficiales, treslladando asina la pelota a la Xunta Xeneral, onde nun dan los númberos pola necesaria mayoría reforciada (tres quintos de la Cámara, esto ye, 27 de los 45 diputaos).
Dende Asturies nun opinen de la mesma forma y propónse una modificación de los reales decretos que regulen les especialidaes docentes de los cuerpos de Maestros, de profesoráu d’Educación Secundaria y d’Escueles Oficiales d’Idiomes, esto ye, los RD 1594/2011, el RD 1834/2008 y el RD 287/2014, incorporando la posibilidá de crear la especialidá docente de llingües propies que, nun siendo cooficiales, tengan reconocimientu xurídicu y implantación curricular. Una cuestión que los gobiernos socialistes de Madrid nun quieren tocar.
Tolón yá conoz de cerca la situación de los maestros d’asturianu, más de 330 docentes condenaos a la interinidá al nun poder presentase a unes oposiciones p’algamar plaza, ente otres cuestiones, en clara discriminación llaboral colos sos compañeros de centru. La selmana pasada axuntó con representantes de la Confederación de Sindicatos de Trabajadores y Trabajadoras de la Enseñanza (STEs), a la que pertenez el Sindicatu Unitariu Autónomu de Trabayadores de la Enseñanza d’Asturies (SUATEA), que-y treslladaron un informe de l’Asociación de Docentes d’Asturianu y Eonaviego/Gallego-asturiano (ADAE) sobre les condiciones d’estos profesionales, documentu que recueye la base llegal necesaria para la creación d’entrambes especialidaes docentes.
Contautos con partíos políticos a nivel estatal
ADAE aconceyó ayeri cola conseyera d’Educación, Eva Ledo, a costafecha pa tratar esti asuntu. De la mesma, los miembros del coleutivu salieron col compromisu de la escritora d’insistir cola cuestión, polo que va solicitar una xunta cola ministra nueva pa treslladar otra vuelta la postura asturiana. El coleutivu valora la «necesidá d’un trabayu conxunto y coordináu ente sindicatos, conseyería y profesores, una idea que foi compartida pola mesma conseyera, que coincidió na importancia de sumar esfuerzos p’avanzar na solución d’esti conflictu».
Los docentes esperen que’l Gobiernu «tome en serio esta problemática y actúe cola determinación necesaria pa poner fin a un conflictu llaboral que caltién en situación d’interinidá a más de 300 docentes», pero, coles mesmes, alvierten que «mientres nun se produzan meyores reales y compromisos firmes, el colectivu va siguir coles movilizaciones hasta llograr una solución xusta y definitiva». El siguiente movimientu ye tratar de llevar l’asuntu a los partíos políticos a nivel estatal, cola posibilidá de fuelga aparcada de momentu énte la predisposición amosada pola conseyera pa buscar una solución al bloquéu.
