Últimos díes pa visitar la muestra qu’acueye la sala 3 del Antiguu Institutu coles ilustraciones del llibru homónimu d’Eva Rami, un abecedariu que percuerre la comunidá al traviés de les sos tradiciones y aspeutos más carauterísticos
De l’A d’Antroxu a la Z de corzu. Eva Rami percuerre Asturies y los sos aspeutos más carauterísticos nel so llibru ilustráu ‘Asturies de l’A a la Z’, qu’esti mes de xineru protagoniza una esposición nel Centru de Cultura Antiguu Institutu en collaboración cola Oficina de Normalización Llingüística. Pue visitase hasta’l xueves y presenta les diferentes creaciones de l’autora xixonesa pa esta obra, amás d’un xuegu nel suelu de la sala 3 de la instalación.
«Esti llibru cuidáu, modernu y atractivu ye un abecedariu illustráu que tresmite valores, tradiciones y referentes propios d’Asturies, atropando pallabres y elementos de la cultura asturiana p’amosar d’una güeyada y con una pallabra lo que más rescampla d’Asturies (el so paisaxe, la identidá y el folclore, la gastronomía, la mitoloxía, les fiestes…)», apunten dende la Fundación Municipal de Cultura, Educación y Universidá Popular. Asina, el diañu burlón, l’horru, la minería, les madreñes, l’Urriellu o Xovellanos, tanto Gaspar como la so hermana Xosefa, protagonicen dalgunes de les lletres d’esta obra de munchu color destinada a la reciella.
