La mazcarada d’iviernu de Valdesoto sigue col vezu de visitar el conceyu vecín pa entamar un Domingu de Sidros y Comedies; munchu públicu averóse a Santuyano pa disfrutar de les representaciones, que tuvieron al presidente Adrián Barbón como espectador
Bimenes, conceyu que nel pasáu contaba con sidros, tornó a disfrutar de los blincos d’estos mazcaritos. Nel 2019, l’Ayuntamientu y l’Asociación pola Recuperación de los Sidros y les Comedies ‘El Cencerru’ fixeron posible la celebración d’un Domingu de Sidros y Comedies y, dende entós, sacante los años de pandemia, esti eventu vien repitiéndose, convirtióse nún de los más esperaos polos yerbatos y los munchos visitantes que s’averente pa disfrutar d’una xornada de trastaes y risotiaes. Un habitual, como’l presidente Adrián Barbón, nun faltó a la cita, amás de diferentes alcaldes de la fastera y diputaos.
El bon día fixo que lluciera entá más la presencia de la mazcarada d’iviernu de Valdesoto, que fixo un pasucais dende la plaza de la Ilesia de Santuyano hasta’l parque, onde se representaron les comedies. Los escolinos punxeron ‘¡Por fin! La comedia ye real’, de Manuel Pergantino; la mocedá, ‘Exemplares hai munchos’, de Fani Moro; y los adultos, ‘Faciendo lo que mos da la real… comedia’, de José Ramón Oliva. Crítica política con munchu humor, con referencias al propiu Barbón o al alcalde Aitor García Corte qu’arrancaron los aplausos de los presentes y de los propios ‘afeutaos’. La situación de la Educación o la demanda de la oficialidá del asturianu —Bimenes declaróla precisamente nel 2016 por unanimidá del Plenu depués d’una primera aprobación nel 1997 que valtó un recursu al Tribunal Superior de Xusticia d’Asturies (TSXA) presentáu nel 1998, sentencia ratificada darréu pol Tribunal Supremu— foron dalgunos de los asuntos que se tocaron.
Cuatro yerbatos amazcaritáronse de sidros nesta ocasión p’animar a los vecinos que visitaron na xornada y llamar a la comedia. L’Asociación Folclórica y Cultural Los Yerbatos encargóse de l’acompañamientu musical nuna xornada que yá ye fixa nel calendariu de Bimenes.
