FSA-PSOE, Foro y Cova Tomé sofitaron la proposición non de llei presentada por Convocatoria por Asturies (IX-Más País-IAS), que contó cola astención del PP y el votu en contra de Vox; nel 2001 foi la primer vez que l’Executivu asturianu fixo esti pidimientu, siempre con negativa en Madrid
Una vegada más, la Xunta Xeneral posicionóse a favor de la creación de la especialidá docente de Llingua Asturiana y Gallego-asturiano. Nesta ocasión foi al traviés d’una proposición non de llei (PNL) presentada ayeri por Convocatoria por Asturies (IX-Más País-IAS) que contó col sofitu de la FSA-PSOE, Foro y la diputada Cova Tomé, eleuta por Podemos. El PP, que nel 2009, llevaba al Parllamentu asturianu otra proposición non de llei referente al idioma na que pidía al Gobiernu del Estáu que reconociera xurídicamente la especialidá pal profesoráu, aprobada por unanimidá llueu d’almitir una enmienda socialista, nesta ocasión astúvose. Vox, cola so postura negacionista sobre la esistencia de la llingua asturiana, foi l’únicu grupu n’asitiase en contra, polo que’l resultáu final de la votación quedó asina: 24 a favor, 17 astenciones y 4 ‘non’.
Xabel Vegas encargóse de defender la PNL con una intervención na que señaló que «tamos énte una situación», la de los profesores de les dos llingües propies d’Asturies, «que nun sólo ye discriminatoria, sinón qu’incumple claramente la normativa europea que prohibe l’abusu de la temporalidá nel emplegu públicu». «Nun tamos pidiendo un privilexu, tamos pidiendo una corrección técnica», aseguró’l voceru de la coalición, al traviés de la modificación de los tres reales decretos que regulen les especialidaes. Asina, señaló que «nun hai escuses, llegales nin pedagóxiques, namás falta la voluntá política de facer lo correuto». «Imaxinen per un momentu trabayar 20 o 30 años nuna empresa o na Alministración faciendo’l mesmu trabayu que’l de la mesa d’al llau pero sabiendo qu’usté nunca va poder tener la plaza en propiedá porque un real decretu en Madrid diz que’l so trabayu nun tien categoría. Eso ye indigno y eso ye lo que queremos iguar güei», calcó.
Namás Vox y el PP punxeron, nel turnu de fixación de posiciones, torgues a la propuesta. Polos populares María Gloria García Fernández, depués de «desear una buena Cuaresma a todas sus señorías hoy —por ayeri— Miércoles de Ceniza”, acusó a Convocatoria por Asturies de traer «aquí una cosa que saben que no puede ser». «Por qué les dan falsas esperanzas a los profesores de asturiano y eonaviego. Por qué bajo un supuesto paraguas de injusticia laboral, que no la discuto, intentan traer una cosas que no es más, a mi entender, que un caminito avanzando hacia el fin último», apuntó enantes d’entamar una defensa de los profesores de la materia de Relixón: «Puede que traiga una PNL pidiendo estabilización para el profesorado de Religión y a ver qué me dicen ustedes». «Nos vamos a abstener porque se les está vendiendo humo», aseguró dirigiéndose a los representes de la Asociación de Docentes d’Asturianu y Eonaviego/Gallego-asturiano (ADAE) y de los sindicatos educativos presentes en la sesión del Plenu de la Xunta Xeneral.
«El PSOE continúa ensin asumir compromisos firmes»
A la salida, el coleutivu qu’axunta a los maestros, llamentó que «la diputada del grupu socialista —Mónica Ronderos— nun concretara nenguna fecha de xunta cola nueva ministra d’Educación nin detallara los pasos que l’Executivu asturianu tien previsto dar». «El PSOE asturianu continúa afirmando que trabaya nello, pero ensin asumir compromisos firmes nin tomalo cola seriedá qu’esta situación requier», critiquen. Tamién amóso la so «decepción ante la postura del Partíu Popular, qu’en 2009 defendía claramente la creación de les especialidaes docentes —presentando inclusive una PNL nesti sentíu— y que nesta ocasión optó pola astención».
Valoren positivamente’l posicionamientu favoratible a les sos demandes de la Xunta Xeneral, anque apunten que «el sofitu parlamentariu tien de traducise agora en pasos concretos y actuaciones efectives per parte del Gobiernu asturianu y del ministeriu p’acabar con esta situación inxusta y anómala dientro del sistema educativu». Y recuerden que nun busquen «privilexos, sinón igualdá»: «Queremos opositar y estabilizanos como’l restu del profesoráu del sistema educativu. Dempués de cuatro décades, yá ye hora”, insisten. El sábadu ta convocada una asamblea nel senu de l’asociación p’acordar les aiciones próximes y, «nel casu de que nos próximos díes el Gobiernu asturianu nun concrete feches nin compromisos firmes», anuncien l’entamu d’un calendariu de movilizaciones.
L’enseñu del asturianu nes escueles entamó nel 1984, pero nun foi hasta’l 2001 cuando’l Gobiernu dio’l pasu de la homologación de l’asignatura d’asturianu, lo que llevaba consigo la creación d’una ‘plantía’ específica d’esta materia de conocimientu y la creación d’una especialidá docente específica de Llingua Asturiana, que foi refugada pol ministeriu al nun considerar al asturianu como una materia básica na educación reglada. Nesti puntu dio avisu tamién de qu’Asturies nun tenía capacidá llegal pa dicha creación. Un cuartu de sieglu depués, la situación sigue allancada, con Madrid utilizando anguaño l’argumentu de la falta d’oficialidá de los dos idiomes pa torgar esta vieya demanda de la comunidá educativa.
