La coalición recuerda que la empresa «lleva años usando una rotulación bilingüe» nos autobuses municipales «ensin que supunxera problema dalgún pa la ciudadanía y ensin que fora motivu d’alderique o de quexes»
Los rótulos billingües nos autobuses municipales nos que los viaxeron reciben la información tanto en castellanu como n’asturianu desapaecerán nos vehículos nuevos pa emplegar únicamente la llingua castellana. Ye la instrucción dada pol forista Pelayo Barcia, conceyal de Tráficu, Movilidá y Tresporte Públicu, según la denuncia pública fecha güei pol edil d’Izquierda Xunida (IX) Alejandro Farpón. «Trátase d’una midida arbitraria, ensin rigor, contraria al trabayu coordináu que fai la Oficina de Normalización Lingüística con otros departamentos municipales pa la promoción y l’usu del asturianu. Nesti casu, EMTUSA lleva años usando una rotulación billingüe ensin que supunxera problema dalgún pa la ciudadanía y ensin que fora motivu d’alderique o de quexes», declara.
«El Gobierno municipal debería d’esclarianos si definitivamente Vox sumó un nuevu conceyal nel gobiernu llocal. Al votu discrepante de Barcia cola so formación énte’l debate sobre la prohibición del burka n’espacios públicos municipales, al negacionismu climáticu pa nun desenvolver la zona de baxes emisiones o a la derogación de la ordenanza de movilidá sostenible, agora atopamos l’enarboliáu de la bandera contra l’usu del asturianu nel rosariu de postures propies de la derecha estrema exhibíes por esti conceyal», espresa Farpón, que conclúi que’l desaniciu de la llingua asturiana de la rotulación de los autobuses municipales «ye una medida que, a lo último, lleva’l sellu de la conceyalía de Barcia: xenerar problemes onde nun los hai. Podemos afirmar que cada midida adoptada pola conceyalía de Tráficu nesti mandatu supón un retrocesu pa Xixón».
