Palafox va cambiar de denominación n’homenaxe al músicu y dibuxante natural d’esti barriu l’añu nel que se cumplen dos décades de la so muerte nun accidente de tráficu na Nueche de San Xuan cuando viaxaba col so grupu Felpeyu a tocar a Catalunya, socesu nel que tamién perdió la vida Carlos Redondo
Cuando llega San Xuan ye inevitable qu’Ígor Medio y Carlos Redondo tornen, anque nunca marcharen, a la memoria de les persones que componen la escena musical asturiana y, sobre manera, de los aficionaos al folk. Al alborecer d’esa nueche máxica pa los pueblos de raigón celta perdíen la vida dos de los sos integrantes más señalaos nun accidente de tráficu cuando circulaben pola autopista AP-68 a la altura de Zuya (Álava) colos sos compañeros de Felpeyu pa tocar en Cataluña depués d’una complicada xornada na foguera de Corvera. Un socesu del qu’esti 2026 se cumplen dos décades y que, nesta ocasión, va venir acompañada d’un reconocimientu nuevu pal tamién dibuxante natural d’El Natahoyo.
La cai Palafox, de momento l’accesu más oriental al paséu marítiumu de Naval Azul, va camudar el so nome a cai Ígor Medio, confirmó ayeri’l Conceyu llueu d’un pidimientu fechu en xineru pola Sociedá Cultural Xixonesa. El cambiu va facese efeutivu con un actu d’homenaxe nel que se va reconocer a «una figura fundamental pa entender la cultura, non sólo pola so contribución musical y plástica, sinón tamién pola so capacidá para dignificar la identidá d’un barriu y la memoria coleutiva».
