La gran espicha de Selmana Santa estrenó’l Pabellón d’Asturies como sede l’añu pasáu, per onde pasaron más de 10.000 persones adultes; La Montera Picona de Ramón acueye’l sábadu la primer fase del concursu que va escoyer la Meyor Primer Sidre l’Añu del 2026
La Feria va acoyer per segundu añu la Primer Sidre l’Añu, la gran espicha de Selmana Santa que nació nel 2010 nel Muséu del Pueblu d’Asturies, sede que tuvo qu’abandonar nel 2024 depués de la negativa de la so direición a ceder el tendayu pa la so celebración. Naquel momentu la Fundación Asturies XXI, organizadora del eventu, tuvo qu’improvisar la edición en L’Atalaya, en Cimavilla, y l’añu pasáu algamó agospiu nel Recintu Ferial d’Asturies Luis Adaro, onde la sidra va tornar a ser protagonista del 2 al 5 d’abril.
Queden, poro, poco más de 15 díes pa esta gran celebración que l’añu pasáu axuntó a más de 10.000 persones adultes nel Pabellón d’Asturies de la Feria, ocupando tamién la parte esterior del mesmo, onde había xuegos tradicionales, una terraza y un espaciu pal baille. Mentanto llega la esperada fecha, los llagares yá tienen preparada la so sidra nuevo, sidra ensin trasegar, pa presentalo al concursu qu’entama esti eventu nel que s’escueye la Meyor Primer Sidre l’Añu, títulu que la edición pasada llevó Prado y Pedregal, del sierense Llagar La Morena.
La primer fase de la competencia, de la que van salir los cinco finalistes, va celebrase’l sábadu a les 12 hores en La Montera Picona de Ramón, una preba a ciegues abierta al públicu. Mentes, el ganador va conocese’l miércoles viniente, a les 18 hores, na mesma sidrería. Ésta va ser la oficial de la XVI Primer Sidre l’Añu, que va mercar 1.000 euros en sidra del ganador pa dexala a disposición de los visitantes a la espicha, que tien un preciu d’entrada de 10 euros y accesu a la sidra fecho sobre la madre de decenes de llagares.
