La conseyera Ana Vanessa Gutiérrez comunicó esti domingu que yá finalizaron tolos estudios necesarios, que se van valorar nel conceyu próximu de la Comisión de Patrimoniu, pa entamar colos trámites formales
Va un añu qu’Ana Vanessa Gutiérrez avanzara en Xixón la decisión de la so conseyería d’entamar col trámite pa declarar a la cultura asturiana de la gaita como Bien d’Interés Cultural (BIC). Ayeri, na Casa de Cultura de Noreña y con motivu del mesmu actu, la celebración del Día Internacional de la Gaita a iniciativa del Coneyu de la Gaita, la responsable de Cultura, Política Llingüística y Patrimoniu informaba que yá ta preparada la documentación p’arrancar colos trámites de proteición, un procesu que va principiar nos próximos meses cuando se treslladen tolos estudios a la próxima Comisión de Patrimoniu.
Ésta va convocase previsiblemente enantes del branu y de contar col preste de la mesma, como s’espera, l’espediente entamaría la so tramitación formal, lo que va permitir reforzar l’estudiu, difusión y conservación de la gaita y la so cultura. Na so intervención en Noreña, Gutiérrez destacó el valor d’esta tradición como parte esencial del patrimoniu asturianu y el trabayu del Conceyu de la Gaita na so investigación y recuperación, poniendo tamién el focu na emigración y el papel fundamental de la muyer y la figura de los constructores.
