Los profesores de les llingües propies de la comunidá van rexistrar un escritu dirixíu a la ministra Milagros Tolón na sede d’Educación, Formación Profesional y Deportes, onde van encadenase de manera simbólica; darréu, van concentrase na Carrera de San Jerónimo
Las movilizaciones de los maestros y maestres de Llingua Asturiana y Gallego-asturiano pola demanda de la creación de la especialidá docente dan güei un pasu más. Dende esta madrugada cerca d’un centenar de profesionales y representantes de sindicatos tán desplazándose a Madrid n’autocar y coches particulares pa llevar la protesta pola so situación llaboral a la capital del Estáu nun convocatoria fecha pola Asociación de Docentes d’Asturianu y Eonaviego/Gallego-asturiano (ADAE). Una visita que va tener dos paraes: el Ministeriu d’Educación, Formación Profesional y Deportes, y el Congresu.
A les 12.30 hores ta prevista la primera na sede del ministeriu, onde se va rexistrar un escritu dirixíu a la ministra Milagros Tolón. Enantes, va desendolcase una aición simbólica consistente nun encadenamientu na sede ministerial. La protesta va llevase darréu al Congresu, pa tornar p’Asturies al rodiu les 17 hores.
«Hai más de 30.000 estudiantes y 332 docentes afeutaos n’Asturies por una situación que s’allarga dende va más de 40 años por falta de voluntá política», denuncien dende ADAE, que recuerda’l sofitu del Gobiernu asturianu d’esta reivindicación histórica de tola comunidá educativa pa finar con una situación de discriminación con respeuto a los sos compañeros de centru. La modificación de los reales decretos por parte del Executivu estatal serviría pa crear la especialidá docente de Llingua Asturiana y Gallego-asturiano, trámite pal que nun ye necesario una tramitación parllamentaria.
