La donación de la Fundación Belenos a la institución xixonesa de tola so coleición, formada por 1.983 exemplares diferentes recoyíos hasta’l 2021, celébrase con esta muestra que permite conocer la evolución del cartelismu asturianu nes décades últimes del sieglu XX y l’entamu del actual
Cartelos de conciertos, fiestes, nueches celtes, movimientu de reivindicación llingüística, ecoloxismu o de temática política recoyíos pola Fundación Belenos ente’l 1976 y el 2005 conformen la esposición nueva del Muséu del Pueblu d’Asturies, de nome ‘Cartelos n’asturianu (1976-2005)’. Un total de 48 exemplares esbillaos de los 1.983 que componen la coleición d’esti coleutivu nacíu nel 1983, clave nel estudiu y difusión de la cultura asturiana, donaos a la institución xixonesa.
Dende la so fundación, l’asociación qu’edita la prestixosa revista ‘Asturies. Memoria encesa d’un país’, con 44 númberos asoleyaos, vien faciéndose con cartelos con presencia de la llingua asturiana, munchos d’ellos efímeros al ser espublizaos con motivu d’una fiesta o actividá concreta, polo que namás se conserven nesti fondu. D’esta forma, conformóse un conxuntu que permite comprobar la evolución del cartelismu nel territoriu nes décades últimes del sieglu XX y del actual. Amás de les 48 pieces espuestes nesta esposición que llega hasta’l 2005, la ciudadanía va tener la totalidá de la coleición de Belenos dixitalizada pa la so consulta.
L’horariu de visita de la muestra, que va tar abierta al públicu hasta ochobre, ye de 9.30 a a 18.30, de martes a vienres, y de 10 a 18.30 hores, sábados y domingos. A partir del miércoles va pasar a ser de 10 a 19 tolos díes a esceición de los llunes, día de pieslle del Muséu del Pueblu d’Asturies. L’accesu ye de baldre.
