Candás acoyó l’actu institucional que da entamu a siete xornaes centraes na llingua y na lliteratura asturiana que’l vienres va tener su xornada central col XLVII Día de les Lletres Asturianes
La gran fiesta de la lliteratura asturiana yá ta en marcha. Un añu más, y yá van 47, mayu entama cola celebración de la Selmana de les Lletres Asturianes, que nesta ocasión ta dedicada a Taresa Cónsul y el teatro asturianu. Esta mañana abrióse con un actu institucional en Candás, nel Teatru Prendes, ún de los principales escenarios de la comunidá na progamación del teatru costumista, anque ya’l xueves la Orquesta Sinfónica del Principáu d’Asturies (OSPA) ponía n’Uviéu’l Conciertu de les Lletres Asturianes.
Adolfo Camilo Díaz y Laura Iglesia coordinen esti año la programación d’una Selmana de les Lletres que busca poner en valor de la figura de Cónsul, monxa benedictina del monesteriu de Santa María de la Vega (Uviéu), autora d’un entremés n’asturianu representáu en 1789 que la convierte na primer dramaturga conocida en llingua asturiana, y, al empar, facer un reconocimientu al teatru costumista, o popular, asturianu como fenómenu escénicu y social que supo consolidar públicos y adaptase a los llinguaxes escénicos nuevos ensin arrenunciar a la so identidá. D’esti llabor de recuperación de la figura de la relixosa naz el llibru conmemorativu de la XVII Selmana de les Lletres Asturianes ‘De viva voz. Taresa Cónsul y el teatru asturianu’ y el documental ‘Taresa Cónsul: a la lluz de la solombra’. La conseyera de Cultura, Política Llingüística y Deporte, Ana Vanessa Gutiérrez, presidió la presentación d’entambres creaciones.
Actividaes en 14 conceyos
El programa de la Selmana de les Lletres Asturianes va desplegase en 14 conceyos estos díes próximos y va axuntar más de venti actividaes, ente representaciones teatrales, conciertos, meses redondes, conferencies, visites y aiciones performatives. Pue consultar la programación completa nesti enllaz.
El vienres va celebrase’l XLVII Día de les Lletres Asturianes, nel que l’Academia de la Llingua Asturiana (ALLA) entama’l so actu académicu nel uvieín Teatru Campoamor a les 19 hores, que se va poder siguir per TPA. Nesta ocasión, la institución va facer entrega del IV Premiu Nacional de Lliteratura Asturiana a Berta Piñán en reconocimientu a la so trayeutoria. Amás, esti día, el Gobiernu, organizador de la Selmana de les Lletres, entama’l Día del Libru Asturianu, con un 10 por cientu na compra de llibros y discos n’asturianu y eonaviego, amás de regalar el conmemorativu ‘De viva voz. Taresa Cónsul y el teatru asturianu’ y, nel casu de la llingua del occidente, ‘Cásasenos a nena’ de Manuel García Galano.
