Representante de l’Asociación de Docentes d’Asturianu y Eonaviego/Gallego-asturiano (ADAE), xunto con miembros de CCOO y SUATEA, van facer nueche nel llugar depués de la respuesta recibida del ministeriu a una entruga del diputáu de Sumar, Rafael Cofiño, sobre la creación de la especialidá
«Consideramos que’l ministeriu nun ta afrontando esta cuestión cola seriedad que merez y sigue ensin ufiertar una solución a un problema qu’afecta directamente a la estabilidá llaboral y a la reconocencia profesional de más de 300 docentes asturianos», apunten dende l’Asociación de Docentes d’Asturianu y Eonaviego/Gallego-asturiano (ADAE), que, dada la situación, y «énte la falta de meyores», güei dio’l pasu d’entamar un zarru na Conseyería d’Educación xunto con representantes de Comisiones Obreres (CCOO) Enseñanza y del Sindicatu Unitariu Autónomu de Trabayadores de la Enseñanza d’Asturies (SUATEA) que sofiten la reivindicación. Ésti va caltenese hasta mañana a primer hora, cuando los maestros y maestros van a acudir al so puestu de trabayu.
Los docentes espliquen que «sabemos que la conseyera d’Educación ta manteniendo interllocución constante col Ministeriu d’Educación», motivu pol que «choca la rempuesta recibida» a una entruga al diputáu de Sumar, Rafael Cofiño. Ésta yera «¿cuenta’l Ministeriu d’Educación, Formación Profesional y Deportes facer los cambios normativos afayadizos pa incorporar la posibilidá de crear especialidaes docentes de llingües propies que, ensin ser cooficiales, tiene reconocimientu xurídicu y implantación curricular, afitando asina les bases pa la creación de les especialidaes docentes de Llingua Asturiana y Eonaviego/GallegoAsturiano y pa garantizar la estabilidá y el reconocimientu profesional del personal docente?». Y la respuesta: «La norma básica del sistema educativu, Llei Orgánica 3/2020, del 29 d’avientu, pol que se modifica la Llei Orgánica 2/2006, del 3 de mayu, d’Educació (LOMLOE), afita que tolos alumnos han tener dominiu, tanto na espresión oral como escrita, de la llingua castellana y, si fora’l casu, de les llingües cooficiales. Amás esti preceutu determina qu’aquelles comunidaes autonómes nes qu’esisten llingües cooficiales que nun tengan esi calter en tol territoriu o llingües non oficiales que gocien de proteición llegal podrán ufriles, nos términos que determine la so normativa reguladora, y, como consecuencia d’ello, aplicable a lo referío al accesu a la profesión docente o a l’habilitación pa impartiles».
«Una vegada más, refúguense compromisos concretos y caltiénse una posición ambigua», valoren los maestros depués de conocer esta contestación. «El Gobiernu del Principáu nun puede llimitase a treslladar la responsabilidá al ámbitu estatal. Esti conflictu precisa d’una rempuesta política firme y una interllocución decidida que dexe desbloquear la situación. Por esti motivu, encamentamos al presidente del Principáu, Adrián Barbón, a esixi-yos al gobiernu central y al Ministeriu d’Educación la seriedá y la contundencia que requier esti conflictu llaboral faciendo valir el pesu que tien como presidente d’una comunidá autónoma del mesmu partíu que’l del Gobiernu central», reclamen al tiempu que recuerden que «cuatro meses depués de la llegada al cargu de la nueva ministra, nun se produxo entá nenguna xunta nin consta un pidimientu formal per parte del Gobiernu asturianu».
