Los profesores y representantes de CCOO Enseñanza y SUATEA abandonaron esta mañana’l zarru na Conseyería d’Educación a les 7 hores p’acudir a los sos puestos de trabayu; «sabemos que’l ministeriu tien tola información necesaria y la pelota ta nel so teyáu», valora ADAE
La conseyera d’Educación, Eva Ledo, recibió del Ministeriu d’Educación, Formación Profesional y Deportes ayeri una confirmación pa un conceyu próximo con Milagros Tolón pa tratar el tema de la especialidá docente, según treslladó a los maestros de l’Asociación de Docentes d’Asturianu y Eonaviego/Gallego-asturiano (ADAE) y representantes de Comisiones Obreres (CCOO) Enseñanza y del Sindicatu Unitariu Autónomu de Trabayadores de la Enseñanza d’Asturies (SUATEA) que protagonizaron ayeri un zarru na conseyería hasta les 7 hores d’esta mañana, cuando salieron de les dependencies p’acudir a los sos puestos de trabayu. Foi nun alcuentru improvisáu a pidimientu de Ledo al conocer la so presencia nel edificiu.
«Aconceyar con ella nun yera’l nuesu oxetivu, pero quixo recibinos y acudimos», apunta Claudia Menéndez, presidenta d’ADAE, qu’apunta al respeuto que «nun sabemos si va ser un alcuentru que nos saque de duldes». Lo que sí tienen claro les maestres y maestros ye que «el ministeriu tien tola información necesaria y la pelota ta nel so teyáu». Sobre los motivos del zarru, apunta que «el nuesu oxetivu ye siguir nel focu mediáticu, facer presión social y sindical, porque creemos que ye la manera, non nesti casu que se pongan a trabayar, porque sabemos que la conseyería ta trabayando y tomándose en serio esti tema, sinón qu’a nivel políticu haya posicionamientu, sobre manera per parte del presidente Adrián Barbón, y que dende’l ministeriu vean que n’Asturies hai movimientu y que esi conceyu pa desbloquiar la especialidá ye necesariu». Nesi sen, ADAE amuesa la so satisfaición pola convocatoria dende Madrid de dichu alcuentru, pero recuerda que «vamos mui pillaos col tiempu nesta llexislatura».
Sobre la nueche, apuntó que «llevóse bien, dientro de la que cabe». Pasáronla na planta baxa de la conseyería y los presentes agradecieron l’ausencia de fríu. «Durmir en suelu nun ye mui confortable, pero como nun yera iviernu y la temperatura yera decente…», rellata pela so parte Borja Llorente, secretariu xeneral de CCOO Enseñanza que, xunto a SUATEA, acompañó a los maestros nel zarru.
«Una cuestión de xusticia»
«Tenemos 332 compañeros que nun pueden tener un trabayu fixu porque nun esisten oficialmente. Y ési ye’l tema del zarru, tratar que la sociedá asturiana siga visibilizando’l problema, que nun caiga nel escazu, y pa presionar pa que’l Ministeriu de Educación faiga daqué y solucione la cuestión, que ye tan fácil como modificar, añadir una pallabra nos decretos que regulen les especialidaes. Nun se pue dicir que como nun ye oficial, nun se crea la especialidá», critica. Una cuestión, como vienen repitiendo los docentes, de «voluntá política». «Y de prioridaes. Pa nosotros ye una cuestión de xusticia, porque al final tasimpidiendo a 332personas tener una vida un poco más digna, namidida en que puedes pidir una hipoteca con seguridáo nun tener que cambiar cada añude destíny, sobre manra, nuntar suxetua recortes», añade.
No que respeuta al conceyu cola conseyera, apuntó que «vamos tar sollertes sobre qué pasará en dichu alcuentru y qué conclusiones hai que sacar del mesmu pa llueu valorar otres actuaciones o non». Entiende Llorente que «tamos énte’l mesmo partíu que gobierna nes dos alministraciones y nun hai nenguna dulda de que, si quixeren, buscaríen la fórmula llegal pa facelo, como se fixo n’otres instancies, por exemplu na creación de les especialidaes de les rames de conocimientu na universidá».
Dende SUATEA, Nuria García Álvarez, presente tamién nel zarrru, amuesa optimismu con respeuto a la cita ente conseyera y ministra. «Creemos lo que nos cuenta y confiamos nella, pero creemos que, non sólo dende la conseyería, sinón dende’l Gobiernu asturianu, hai que siguir presionando al ministeriu porque la oportunidad ye histórica y hai qu’aprovechala», espresa llueu d’una nueche «un poco incómoda», anque apunta que «ye lo que toca». Porque pasaron más de 40 años d’escolarización y la situación de les maestres y maestros sigue siendo la mesma. «Nun tienen la posibilidá d’estabilizar; nun se pueden presentar a oposiciones, tienen que cambiar práuticamente cada cursu de centru; nun pueden optar a les mesmas condiciones que’l resto del profesoráu, col perxuiciu que conlleva tamién pal alumnado», rellata, ensin escaecer tamién lo que supón esta situación «pa la organización de los centros».
Y recuerda que la solución pasaría por «modificar dos reales decretos, de manera que nun se fale sólo de llingües oficiales, sinón de dexar la puerta abierta pa que n’Asturies se puedan incluyir eses especialidaes». Una cuestión cenciella que-y lleva ser nesta ocasión optimista sobre una demanda que SUATEA caltién «dende que se creó’l sindicatu», anque considera necesario «siguir faciendo presión desde lo popular, dende lo social y dende lo sindical, porque, si non, ye posible que la cosa quede otra vez pa prau».
