«El meyor homenaxe a los héroes correctos —los asediantes y depués víctimes de los falsos héroes del ‘Simancas’— nun ye homenaxalos ensin más, o borrar del espaciu públicu los homenaxes a los sos verdugos, sinón llevar a la práctica’l mundu pol que combatieron»
Los héroes falsos del ‘Simancas’ nun merecen un homenaxe, porque nun esiste l’heroísmu ensin la nobleza del ideal que lu motive, y polo tanto nun esiste l’heroísmu fascista, l’heroísmu golpista, l’heroísmu d’alzar la última dictadura d’Europa Occidental. Tampoco hai qu’escuchar a los que se riesguen les vestidures clamando pol respetu a la hestoria: el llugar de la hestoria son los llibros, les biblioteques, los arquivos, los museos, non les cais de les ciudaes. Un pedestal, una escalinata monumental, el lletreru d’una cai, nun cunten una hestoria: empondérenla. Y tan la hestoria ye que’l franquismu emponderara a los golpistes emporfiaos del Simancas como que la nuesa dómina decida dexar de facelo. Nós tamién somos parte de la hestoria, tamién la facemos, tamién nos estudiarán los homes del futuru y dexarán intactes les estatues que llevantemos, o les embalarán con destín a un muséu o al vertideru, y alzarán otres nel llugar. Cada xeneración trai lo suyo y cumple coles que considera les sos obligaciones. La obligación de la nuesa ye llimpiar les nueses ciudaes, ciudaes d’una democracia europea, d’escrecencies franquistes.
Dichu tou eso, hai una reflexón que facese dende la esquierda. Que la resistencia de los facciosos del ‘Simancas’ dexe de ser homenaxada ye una victoria, pero a los que la celebramos tien d’esmolecenos una cosa: que paeza una victoria mayor, y non menor; la meyor noticia del añu municipal, y non una bona noticia más. Con frecuencia la memoria histórica conviértese neso: un premiu de consolación; lo que facemos cuando nun podemos facer más. Volver los güeyos al pasáu pa desquitanos de la frustración de nun ser capaces de tresformar el presente. María José Capellín facíase esa reflexón n’una entrevista recién col qu’escribe:
«La memoria histórica […] ye otra manera d’escapate de la realidá. [… Y]e bien importante. Cuando nos dicen que na Transición nos escaecimos d’ella, yo respuendo qu’entós había un problema de tiempu y d’enerxía. Si dediques un montón d’esfuerzu a recuperar la memoria, nun lu dediques a construyir el presente, a resolver los sos problemes. Alcuérdome d’una conversación con Amaro del Rosal sobro los riesgos. La situación yera bien precaria, de cutio amenaciada; él aportunaba en que se taba perdiendo información, alcordances. Coles mesmes, tábamos d’alcuerdu en que quiciabes nun fuera’l momentu, pero sabíamos qu’en cuanto la situación estabilizara habría que facelo. En resume, naquella dómina optamos, creo que con sensatez, por dicir: yá llegará el tiempu de recuperar la hestoria. […] Y agora siénteste mal porque hai una historia que se perdió pel camín y muncha xente que nun se sintió conocida y reconocida; que nun pudo cuntar la so hestoria. […] Y […] hai muncho que facer: sacar los cadabres de les cunetes, recuperar la memoria, cuntar la hestoria. Pero pienso que nun tienen de centrase toles enerxíes neso. [… T]engo la sensación de qu’evita la sensación d’impotencia énte la situación actual».
El meyor homenaxe a los héroes correctos —los asediantes y depués víctimes de los falsos héroes del ‘Simancas’— nun ye homenaxalos ensin más, o borrar del espaciu públicu los homenaxes a los sos verdugos, sinón llevar a la práctica’l mundu pol que combatieron. Un Xixón de dereches ensin la cruz del Simancas nun ye meyor noticia qu’un Xixón d’esquierdes que caltuviera la cruz. Un Xixón d’arriendos disparaos y impagables, xentrificáu, turistificáu, oligarquizáu, hostil a los xixoneses, nun merez más la pena qu’un Xixón de toos y pa toos nel que la cruz siguiera de pies. Y hai que querelo tou y lluchalo tou: la xusticia social y l’hixene democrática. Pero nunca facese trampes al solitariu.
