Los coleutivos consultaos almiten contautos recientes, pero retrasen cualesquier posicionamientu hasta conocer les propuestes concretes de la periodista xixonesa pa coles llingües propies nel ente
El posible relevu na direición de la Radio Televisión del Principáu d’Asturies (RTPA) caltién nuna posición de cautela y espectación a los sectores pola normalización del asturianu, que siguen con atención los movimientos alredor de la candidatura de la investigadora xixonesa Azahara Cañedo p’asumir el mandu del ente públicu. Delles fontes consultaes coinciden en señalar que’l clima predominante ye’l de la prudencia, a la espera de conocer cuáles seríen les llinies de trabayu y el proyeutu concretu qu’impulsaría la profesora universitaria nel ente autonómicu de comunicación no tocante a les llingües propies.
Hasta’l momentu, nenguna de les entidaes consultaes posicionóse frontalmente en contra de la candidatura d’Azahara Cañedo. «Ta tol mundu un poco a la espera», resumen dende ún de los colectivos consultaos, que nagüen por conocer qué plantegamientu tendría la futura responsable respeuto a la presencia de la llingua asturiana y eonaviego o gallego-asturiano y del sector audiovisual venceyáu a estos idiomes.
Ente dalguna de les organizaciones yá se caltuvieren conversaciones con Cañedo n’etapes anteriores, retomaes recién al salir el so nome como alternativa a la fallida propuesta del periodista navarru Daniel Forcada, que la FSA-PSOE nun llegó a oficializar. Entá asina, el mensaxe internu sigue siendo de cautela. Les fontes consultaes insisten en que, más allá de les valoraciones personales, el movimientu que trabaya pol asturianu quier esperar a conocer propuestes concretes enantes de fixar una posición pública definitiva.
Dende otros ámbitos culturales y llingüísticos tamién se caltién una postura asemeyada. Dalgunes voces destaquen positivamente la trayeutoria académica d’Azahara Cañedo y les sos investigaciones sobre la RTPA y el sistema audiovisual asturianu, amás de valorar el fechu de proceder del ámbitu universitariu y non d’estructures estrictamente partidistes. El so conocimientu del ente públicu, oxetu de la so tesis doctoral, ye ún de los elementos que más interés despierta ente parte del sector consultáu.
Sicasí, dende posiciones más esixentes dientro del movimientu de defensa del asturianu insístese en que’l debate principal nun tien de centrase namái nel perfil personal de la candidata, sinón nel rumbu que tomará la RTPA mientres los años próximos. Ente les reivindicaciones históriques que siguen enriba la mesa figuren una mayor presencia del asturianu na programación diaria, l’incrementu de conteníos específicos y una apuesta más decidida pola producción audiovisual venceyada a les llingües propies.
Dalgunes fontes consideren que la eventual llegada d’Azahara Cañedo a la direición xeneral tendría de dir acompañada de compromisos claros nesi sentíu. Otres organizaciones, sicasí, reconocen que tovía nun debatieron internamente sobre la so figura nin conocen detalles concretos del proyeutu que podría encabezar.
Poro, la prudencia ye la postura xeneralizada. Naide nun quier precipitase enantes de conocer los pasos definitivos del Gobiernu asturianu y el programa que se pondrá enriba pa la mesa pa la RTPA. Mentanto, los sectores pola normalización del asturianu miren con atención una designación que pue marcar el futuru inmediatu de la radiotelevisión pública y la so rellación cola llingua asturiana y l’eonaviego.
