El conceyu entre la conseyera d’Educación y la ministra pa tratar la creación de la especialidá docente, comprometíu por Madrid pa esti mes, sigue ensin celebrase «y yá vemos en qué fecha tamos», apunta Claudia Menéndez, presidenta de Asociación de Docentes d’Asturianu y Eonaviego/Gallego-asturiano (ADAE)
Los maestros de Llingua Asturiana y Gallego-asturiano tornaron encadenase de maneras simbólica dos meses depués, nesta ocasión frente a Delegación del Gobiernu n’Asturies, «pa siguir reclamando al Ministeriu d’Educación una solución urxente a la situación de discriminación llaboral que sufre esti colectivu». «L’Alministración encadénanos a la interinidá», apuntaba ayeri Claudia Menéndez, presidenta dela convocante Asociación de Docentes d’Asturianu y Eonaviego/Gallego-asturiano (ADAE), que contó col sofitu na concentración de docentes d’otres especialidaes, families, organizaciones de reivindicación llingüística, sindicatos y representantes políticos.
N’Uviéu, al igual que’l 30 de marzo en Madrid frente al Ministeriu d’Educación, Formación Profesional y Deportes, y el Congresu, los maestros repitieron la mesma ‘performance’, consistente en dicir n’altu «caún de los 42 cursos que lleva presente l’asturianu nes escueles y que’l profesoráu ta nesta situación de precariedá»al empar que se mostraben papeles mostrando cada fecha de los mesmos. «Nestos dos meses nun tenemos conocimientu d’avance negún», namás el compromisu del ministeriu de celebrar un conceyu ente la conseyera Eva Ledo y la ministra Milagros Tolón esti mes, «y yá vemos en qué fecha tamos», apunta Menéndez. Al respeuto señala que «confiamos relativamente, porque yá conocemos l’historial de les alministraciones nesti tema y siguiremos movilizándonos si nun hai avances. El Gobiernu asturianu y la conseyería tienen que puxar por qu’esi alcuentru se faga y que la rempuesta seya satisfactoria pal profesoráu, p’Asturies y pa la educación pública».
«Los drechos llaborales del profesoráu d’asturianu y gallego-asturiano nun pueden siguir esperando más», espresa ADAE nun comunicáu, porque «l’asignatura esiste, el profesoráu ta plenamente formáu y capacitáu y más de 30.000 alumnos y alumnes cursen anguaño Llingua Asturiana y Gallego-asturiano n’Asturies. Nun falten nin alumnáu, nin docentes, nin voluntá social: falta namás la voluntá política pa facer les modificaciones llexislatives necesaries que permitan acabar con esta anomalía».
