«Per tres díes», del 5 al 7 de xunu, «el Parque Fluvial va tornar a enllenase de gaites, baille, artesanía, mitoloxía y cultura asturiana viva», destaca Carmen Riesgo, de la organizadora Banda Gaites Saxum; l’alcuentru de bandes va contar cola participación de cinco formaciones asturianes y la cantante Eva Hevia
Va dos años celebrábase con ésitu a lo último de setiembre una iniciativa nueva de la mano de la Banda Gaites Saxum, el Xixón Folk, que depués de pasar a xunu na segunda edición consolídase nesti mes pa convertise na folixa cola que «arranca el branu», como señaló Fernando Losada, xerente de Divertia, na presentación del eventu que va tener llugar del 5 al 7 de xunu en Viesques. «Per tres díes, el Parque Fluvial va tornar a enllenase de gaites, baille, artesanía, mitoloxía y cultura asturiana viva», destacó, tamién en castellanu, Carmen Riesgo, integrante de la xunta direutiva de Saxum. Una apuesta por «un formatu participativu, familiar y al aire llibre con una variada programación abierta a tolos público» que va tener a Dixebra y una Nueche en Danza como atractivos principales xunto col Alcuentru de Bandes de Gaites.
El mercáu tradicional, que va contar con una exhibición de oficios tradicionales (forxa, talla en madera, vidru o apicultura, ente otres), va abrir les sos puertes a les 17 hores del vienres (hasta les 21.30 hores, con actividá el sábadu y el domingu dende les 11 hores), cuando Nerea Vázquez va dar el pregón a les 20 hores. Enantes va haber llugar pa talleres participativos (instrumentos tradicionales, tiru con gomeru, cueru, xoyería, marionetes o güevos pintos, ente otros) y un pasucais de seres mitolóxicos, actividaes que tamién se programen el restu de díes. A les 21.30 hores ta previstu l’entamu de la Nueche en Danza con Soi Panderetera, Grupu Etnográficu L’Oriente-Llacín, Los del Prau Chanu y Pandereteres de Trebeyu, pa finar con un escenariu abiertu. Los menos espertos en baille tradicional van poder deprender pasos básicos nun taller que va principiar a les 20.30 hores a cargu del Grupo Folklórico Trebeyu.
Los xuegos tradicionales van protagonizar la mañana del sábadu dende les 11 hores. A les 13 va ponese l’espectáculu de títeres ‘El carro de los fenómenos ambulantes’, de Zorro Gallego, pa siguir con una sesión vermú con la Bandina Los Trimendos. El III Alcuentru de Bandes de Gaites va comenzar a les 17.30 hores con un pasucais dende la cai Tapia a la rotonda de Corín Tellado, puntu d’entrada a la zona del Fluvial onde se celebra’l festival. Amás de Saxum, participen Castrillón, Villaviciosa-El Gaitero y Conceyu Llangréu, mientres que’l baille va ponelu’l Grupu Folclóricu Prau Llerón. La cantante Eva Hevia va ufrir una colaboración especial nesta xuntanza.
Los Gascones van calecer, dende les 21.30 hores, l’ambiente pa la Nueche Folk, que nesta ocasión va tar protagonizada por Dixebra. L’históricu grupu de rock n’asturianu, qu’en en xineru cumple 40 años, va poner a blincar al Xixón Folk dende les 23 hores colos sos clásicos y cantares del so trabayu últimu, ‘Ente la niebla’. DJ La Güeriata va allargar la madrugada col so amiestu d’electrónica y raigañu.
Los talleres, xuegos tradicionales, títeres y sesión vermú van tar tamién na programación del domingu, nel que La Alegría de Porceyo va ufrir les sos bailles a les 12.30 hores. Un tardéu folk, a les 16 hores, va ocupar la tarde del domingu con Carlos Velasco & Chino El Indio xunto con una exhibición de deporte rural a cargu de 6 Conceyos. Mentes, Rollu Folk va poner el ramu al Xixón Folk a les 19 hores.
«Xixón Folk nació cola ilusión de crear un espaciu propiu pa la música y la cultura asturiana. Tres ediciones depués, queremos que sía muncho más qu’un festival. Ye un llugar d’alcuentru ente xeneraciones, artistes, músicos, artesanos y públicu en xeneral onde la tradición se vive, se toca, se comparte y, sobre manera, se disfruta», resume Riesgo, que destacó el apoyo tanto de Divertia como de la Fundación Gijón Rural. Nos tres díes de celebración, el públicu tamién va disponer d’un espaciu gastronómicu con pulpería, pizzería, kebab o xelaos, ente otros puestos.
